Тожикистон президенти Эмомали Раҳмон 30 июнь куни Афғонистон Миллий Кенгаши раиси Мир Раҳмон Раҳмоний билан учрашув ўтказди. Бу ҳақда Asia-Plus хабар берди.
Суҳбат чоғида Тожикистон раҳбари Афғонистонда давом этаётган тартибсизликлар билан боғлиқ ҳолда, халқаро ҳамжамиятни ташвишга солаётган ушбу қўшни мамлакатдаги сиёсий ва ҳарбий вазиятнинг кескинлашуви хавфсизлик соҳасида икки давлат ўртасида амалий ҳамкорликни талаб қилишини айтди.
Шунингдек, террорчилар ва гиёҳванд моддалар савдоси билан шуғулланадиган уюшган жиноий гуруҳларга қарши самарали чоралар кўриш зарурлиги таъкидланди.
Учрашувда мамлакатлар ўртасидаги сиёсат, мудофаа, иқтисодиёт, савдо, фан, таълим, оммавий ахборот воситалари ва соғлиқни сақлаш соҳаларидаги бошқа ҳамкорлик жараёнлари, хусусан, парламент алоқалари ҳам муҳокама қилинди.
«Биз тинчлик ва барқарорликни ҳамда республика иқтисодиётини тиклаш йўлида тилимиз, маданиятимиз муштарак бўлган дўстона мамлакат ҳукумати ва халқининг ташаббуслари ҳамда ҳаракатларини ҳар доим қўллаб-қувватлаймиз», — деди Эмомали Раҳмон. «Тожикистон халқи нафақат географик нуқтаи назардан, балки умумий қадриятлар нуқтаи назаридан ҳамиша Афғонистон халқи томонида бўлади».
Томонлар, шунингдек, энергетика, янги транспорт коридорларини ташкил этиш ва қўшма дастурларни амалга ошириш каби ҳар икки мамлакат учун устувор ва ўзаро манфаатли соҳаларда алоқаларни кенгайтириш бўйича фикр алмашди.
Изоҳ (0)