Rossiya Ichki ishlar vazirligining hududiy organlari 2021-yilning birinchi choragida 1345 nafar chet el fuqarosi va fuqaroligi bo‘lmagan shaxslarni deportatsiya qildi. 2020-yilning shu davrida bu ko‘rsatkich 1139 kishini tashkil etgandi, deb yozadi “Izvestiya” vazirlik ma’lumotlariga tayanib.
Ichki ishlar vazirligi, shuningdek, 2021-yilning besh oyida 27,8 mingta ishlash ruxsatnomasi hamda 538,7 mingta patent berilganini xabar qildi. Jamoatchilik palatasi qonunni buzgan muhojirlarni chiqarib yuborishni to‘g‘ri chora deb atadi, ammo Rossiyaning xorijiy ishchi kuchiga bo‘lgan ehtiyojini eslatib o‘tdi. Shu bilan birga, ba’zi ish beruvchilar pul tejab qolish uchun noqonuniy muhojirlarni yollashni afzal ko‘radi, deyiladi davlat Dumasida.
Ichki ishlar vazirligining axborotiga ko‘ra, 2021-yil 31-may holatiga ko‘ra, ishlash uchun amaldagi ruxsatnomalar soni 71,1 mingta (o‘tgan yili — 91 ming), patentlar — 1,1 millionta (o‘tgan yili —1,5 million) bo‘lgan.
“Qonunni buzgan muhojirlarni mamlakatdan chiqarib yuborish mantiqiy va to‘g‘ri chora hisoblanadi”, — dedi Millatlararo va dinlararo munosabatlarni uyg‘unlashtirish bo‘yicha jamoat palatasi komissiyasining raisi, Rossiya xalqlari assambleyasi kengashi raisining birinchi o‘rinbosari Vladimir Zorin.
Uning so‘zlariga ko‘ra, Rossiya o‘zining sanoat salohiyati va iqtisodiy ko‘rsatkichlarini oshirishga intilayotgani tufayli unga xorijiy ishchi kuchi zarur.
“Bu yerda demografiya omili muhim ahamiyatga ega. Mamlakatimizning ko‘p qismida nafaqat aholining tabiiy pasayishi, balki migratsiya ham kuzatilmoqda, odamlar hududlarni tark etmoqda. Biz iqtisodiyotimiz uchun zarur va ma’lum malakalarga ega odamlarning mamlakatimizga kelishi uchun sharoit yaratib berishimiz kerak. Eng muhimi, ular bizning qonunlarimizni va madaniyatlararo muloqotimizning qabul qilingan me’yorlarini buzmasligi kerak”, — deydi Vladimir Zorin.
U Rossiya Federatsiyasi uchun zarur migrantlarni tanlash tizimini yaratish lozimligini aytdi. Davlat Dumasining ta’kidlashicha, chet el fuqarolarini Rossiya madaniy maydoniga birlamchi integratsiya qilish vazifasi mavjud. Shunga qaramay, rossiyalik tadbirkorlar ba’zida qonun bo‘yicha ishlashni xohlamaydi, chunki ular uchun noqonuniy muhojirlarni yollash kamxarjroq.
“Yirik bizneslar chet eldan keluvchi aqlli kadrlarni istamaydi. Bu ko‘proq qora bozorga xos. Biz til biladigan, tibbiy tekshiruvdan o‘tgan odamlarni yollash jarayonini tartibga solishga harakat qildik. Biroq hozirgi kunga qadar bunday yollash tartibi ishlamayapti. Ammo ular gastarbayterlarni faol jalb qilmoqda, ularga ish haqi konvertda va rossiyaliklarga nisbatan ancha kam qiymatda to‘lanadi. Bu yerda yetarli ishga ega bo‘lmagan rossiyaliklar ham, noqonuniy muhojirlar ham aziyat chekmoqda”, — dedi davlat Dumasining MDH ishlari, Yevrosiyo integratsiyasi va vatandoshlar bilan aloqalar qo‘mitasi raisi Leonid Kalashnikov. Uning so‘zlariga ko‘ra, rossiyaliklarni ishga borishga rag‘batlantirish uchun ishchi kasblarning obro‘sini oshirish kerak.
“Ba’zi Yevropa mamlakatlarida bu yo‘l allaqachon muvaffaqiyatli bosib o‘tilgan va mahalliy aholi o‘z xohishi bilan, deylik yo‘l qurilishida ishtirok etmoqda. Xuddi shunday farroshlarga ham xizmat uyini berish va munosib ish haqi taklif qilish mumkin” — deya qo‘shimcha qildi u.
Avvalroq Rossiya qurilish maydonlariga 2024-yilga qadar 5 million mehnat muhojirini jalb etish zarurligi ma’lum qilingandi.
Izoh (0)