Shavkat Mirziyoyev raisligida 1-iyul kuni davlat aktivlarini xususiylashtirish sohasidagi ishlar natijadorligi va kelgusidagi ustuvor vazifalar muhokamasi yuzasidan videoselektor yig‘ilishi o‘tkazildi. Bu haqda Prezident matbuot xizmati xabar qildi.
Xususiylashtirish – muhim iqtisodiy tadbirlardan biri. Bu nafaqat budjetga tushumni ta’minlaydi, balki yangi investitsiya loyihalari, ish o‘rinlari va qo‘shilgan qiymat uchun poydevor bo‘lib xizmat qiladi. Chunki tadbirkorlik rivoji uchun eng zarur sharoit, avvalo, yer, bino va infratuzilmadir.
Shu bois xususiylashtirish masalasi iqtisodiy islohotlarning asosiy yo‘nalishlaridan biri etib belgilangan. 2021- va kelgusi yilda davlat ulushi bo‘lgan korxonalar sonini kamida 3 barobar qisqartirish bo‘yicha ish olib borilmoqda. Bu islohotlar dunyodagi nufuzli ekspertlar va ommaviy axborot vositalari tomonidan ham e’tirof etilmoqda.
2020-yil 27-oktabrda Prezidentning “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar to‘g‘risida”gi farmoni qabul qilingan edi. Bu boradagi ishlar o‘z samarasini berib, joriy yilning birinchi yarmida 478 ta davlat mulki 1 trillion 100 milliard so‘mga sotildi.
Lekin bu borada qilinadigan ishlar hali ko‘p. Xususan, sotilishi belgilangan 556 ta mulkdan 288 tasi savdolarga chiqarilmagan. Shuningdek, davlat korxonalari va banklar ixtiyorida ularning asosiy faoliyatiga xos bo‘lmagan 511 ta obyekt haligacha sotilmasdan turibdi.
Mavzuga doir:
- “Yer sotilmaydi!”. “Shahidlar xotirasi” yodgorlik majmuasi shahar yerlarini sotish evaziga ta’mirlanishi haqidagi xabarlarga munosabat bildirildi
- Qarshida fermerning rejadan ortiqcha g‘allasi IIB va Milliy gvardiya xodimlari ishtirokida tortib olindi
- Senat Toshkent viloyatidagi tuman va shaharlar chegarasini o‘zgartirish bo‘yicha qarorni ma’qulladi
Izoh (0)