O‘zbekistonda sudyalarning oylik maoshi 16 million so‘mdan boshlanadi. Bu haqda Sudyalar Oliy kengashida bo‘lib o‘tgan matbuot anjumanida ma’lum qilindi, deya xabar bermoqda “Daryo” muxbiri Musulmonbek Ibrohimov.
Ta’kidlanishicha, O‘zbekistonda sudyalarga budjet muassasa va tashkilotlari xodimlarining lavozim tarif stavkalaridan kelib chiqib, 18-tarif razryadidan 21- razryadgacha bo‘lgan oraliqda maosh belgilangan. Bunda sudya yashab turgan hududi va ish hajmiga ko‘ra maosh oladi.
“Sudya oladigan oyligining yarmi O‘zbekiston sharoitida bemalol bir oilaning oylik xarajatlarini qoplashga yetadi. Maoshining yarmini bir yil davomida to‘plasa, mashina ham olishi mumkin”, — deydi Sudyalar Oliy kengashi raisi Xolmo‘min Yodgorov.
Yodgorovning qayd etishicha, faqat maoshning yuqoriligi bilan korrupsiyani oldini olib bo‘lmaydi — “bu sudyaning ma’naviyatiga ham bog‘liq”.
Eslatib o‘tish joiz, 2019-yil dekabrida Oliy sud sudyasi Ibrohim Tojiyev Oliy sudda faoliyat yuritayotgan sudyalarning o‘rtacha oylik ish haqi 5 million so‘mdan 8 million so‘mgacha yetishini ma’lum qilgandi.Ma’lumot uchun, Korrupsiyaga qarshi kurashish agentligi tomonidan ishlab chiqilgan “Davlat xizmatchilarining daromadlari, mol-mulki va manfaatlar to‘qnashuvini deklaratsiya qilish to‘g‘risida”gi qonun loyihasida sud idoralari xodimlari ham daromadlar deklaratsiyasini to‘ldirishi ko‘zda tutilgan. Shuningdek, ushbu yo‘nalishda yana boshqa qator hujjatlar loyihalarida 2022-yil 1-yanvardan boshlab davlat xizmatchilari, ularning turmush o‘rtog‘i va voyaga yetmagan farzandlarining daromadlari va mol-mulkini majburiy deklaratsiya qilish tizimini joriy etish taklifi ilgari surilgan.
Avvalroq, 2021-yil martida Oliy sud sudyasi Abduvohid Qosimov jurnalistlarning sudyalar maoshi haqidagi savoliga javob berarkan, “bitta oilani boqishga yetishi”ni ma’lum qilgan, biroq uning miqdorini “tanqidiy fikrlarning oldini olish nuqtai nazaridan ochiqlanmasligi kerak, deb hisoblashi”ni bildirgan edi.
Izoh (0)