Uzbekistan Airports boshqaruv raisi Ra’no Jo‘rayeva 28-iyun kuni “Urganch” xalqaro aeroportida sayyor yig‘ilish o‘tkazdi. Bu haqda kompaniya matbuot xizmatiga tayanib, “Gazeta.uz” xabar berdi.
Uning buyrug‘iga ko‘ra, Ruslan Og‘abullayev “Urganch” aeroporti direktori etib tayinlandi. Og‘abullayev 1980-yilda tug‘ilgan bo‘lib, 2006-yildan buyon ushbu aeroportda faoliyat ko‘rsatib keladi. Tayinlovga qadar u direktorning ishlab chiqarish bo‘yicha birinchi o‘rinbosari lavozimida ishlagan. Unga qadar aeroportga Xudoybergan Kuryazov rahbarlik qilib kelayotgan edi.
“O‘zbekiston aeroportlari strategiyasida aeroport boshqaruviga yosh kadrlarni tayinlash muhim. Bugun aeroportda kamida 5 yil ishlagan, yaxshi ixtisoslashgan ta’limga ega, va eng muhimi, o‘zining natijakorligi, faolligi hamda aeroportni yaxshilashga bo‘lgan ulkan xohishi bor, yosh, potensialli kadrlar aeroportning muhim rahbarlik lavozimlariga tayinlandi”, — deydi Ra’no Jo‘rayeva.
Aeroportning yangi rahbariyati oldiga aeroportning ishlab chiqarish-xo‘jalik faoliyatini tubdan yaxshilash, uning noishlab chiqarish xarajatlarini kamaytirish, yo‘lovchilar va aviakompaniyalarga xizmat ko‘rsatish sifatini oshirish bo‘yicha ustuvor vazifalar qo‘yilgan.
Eslatib o‘tamiz, Ra’no Jo‘rayeva 2021-yilning fevralida Uzbekistan Airports kompaniyasiga direktor etib tayinlangandi. Bunga qadar u Rossiyaning eng yirik aviatsion va kosmik xoldingi rahbari lavozimida ishlab kelayotgan edi.
Izoh (0)