Surxondaryo viloyati Qiziriq tumanida fuqaroni o‘qishga kiritib qo‘yishni va’da qilgan o‘qituvchi qo‘lga olindi. Bu haqda Bosh prokuratura huzuridagi departament xabar berdi.
Ma’lum qilinishicha, Bosh prokuratura huzuridagi departamentning Qiziriq tuman bo‘limi tomonidan tezkor tadbir o‘tkazilgan. Tadbirda tumandagi umumiy o‘rta-ta’lim maktabi o‘qituvchisi Sh.D. fuqaro M.ning ishonchiga kirib, uning o‘g‘lini 4 ming dollar evaziga Toshkent shahridagi tanishlari orqali O‘zbekiston davlat jismoniy tarbiya va sport universitetiga o‘qishga kiritib qo‘yishni va’da qilgani aniqlangan. Sh.D. kelishilgan mablag‘ning 2 ming dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda talabaning o‘qishini sirtqi bo‘limga ko‘chirib berish uchun 500 dollar so‘ragan dekan o‘rinbosari ushlangani, Chirchiq davlat pedagogika institutiga o‘qishga kiritib qo‘yish uchun ikki kishidan 9 ming dollar olgan yana bir shaxs qo‘lga olingani, Qoraqalpoq davlat universitetiga o‘qishga kiritib qo‘yish uchun 25 mln so‘m talab qilgan assistent ushlangani to‘g‘risida xabar berilgandi.
Izoh (0)