Ўзбекистонда судьяларнинг ойлик маоши 16 миллион сўмдан бошланади. Бу ҳақда Судьялар Олий кенгашида бўлиб ўтган матбуот анжуманида маълум қилинди, дея хабар бермоқда «Дарё» мухбири Мусулмонбек Иброҳимов.
Таъкидланишича, Ўзбекистонда судьяларга бюджет муассаса ва ташкилотлари ходимларининг лавозим тариф ставкаларидан келиб чиқиб, 18-тариф разрядидан 21- разрядгача бўлган оралиқда маош белгиланган. Бунда судья яшаб турган ҳудуди ва иш ҳажмига кўра маош олади.
«Судья оладиган ойлигининг ярми Ўзбекистон шароитида бемалол бир оиланинг ойлик харажатларини қоплашга етади. Маошининг ярмини бир йил давомида тўпласа, машина ҳам олиши мумкин», — дейди Судьялар Олий кенгаши раиси Холмўмин Ёдгоров.
Ёдгоровнинг қайд этишича, фақат маошнинг юқорилиги билан коррупцияни олдини олиб бўлмайди — «бу судьянинг маънавиятига ҳам боғлиқ».
Эслатиб ўтиш жоиз, 2019 йил декабрида Олий суд судьяси Иброҳим Тожиев Олий судда фаолият юритаётган судьяларнинг ўртача ойлик иш ҳақи 5 миллион сўмдан 8 миллион сўмгача етишини маълум қилганди.Маълумот учун, Коррупцияга қарши курашиш агентлиги томонидан ишлаб чиқилган «Давлат хизматчиларининг даромадлари, мол-мулки ва манфаатлар тўқнашувини декларация қилиш тўғрисида»ги қонун лойиҳасида суд идоралари ходимлари ҳам даромадлар декларациясини тўлдириши кўзда тутилган. Шунингдек, ушбу йўналишда яна бошқа қатор ҳужжатлар лойиҳаларида 2022 йил 1 январдан бошлаб давлат хизматчилари, уларнинг турмуш ўртоғи ва вояга етмаган фарзандларининг даромадлари ва мол-мулкини мажбурий декларация қилиш тизимини жорий этиш таклифи илгари сурилган.
Аввалроқ, 2021 йил мартида Олий суд судьяси Абдувоҳид Қосимов журналистларнинг судьялар маоши ҳақидаги саволига жавоб бераркан, «битта оилани боқишга етиши»ни маълум қилган, бироқ унинг миқдорини «танқидий фикрларнинг олдини олиш нуқтаи назаридан очиқланмаслиги керак, деб ҳисоблаши»ни билдирган эди.
Изоҳ (0)