Hukumatning 29-iyundagi qarori bilan Jizzax shahrida Hindistonning Sambhram universiteti tashkil etildi, deb xabar bermoqda Adliya vazirligi matbuot xizmati.
Ushbu universitet nodavlat oliy ta’lim tashkiloti hisoblanadi. Universitetning asosiy vazifa va faoliyat yo‘nalishlaridan biri axborot-kommunikatsiya texnologiyalari sohasida oliy ma’lumotli kadrlarni tayyorlashdir.
Universitetda o‘qitish kunduzgi ta’lim shaklida ingliz, rus tillari va davlat tilida to‘lov-kontrakt asosida amalga oshiriladi.
Bakalavriat ta’lim yo‘nalishlari va magistratura mutaxassisliklariga qabul parametrlari universitet tomonidan belgilanadi. Universitet bitiruvchilariga O‘zbekiston va Hindistonda oliy ta’lim to‘g‘risidagi hujjat sifatida tan olinadigan diplom beriladi.
Qarorga ko‘ra, universitetga har yili qabul qilinadigan talabalarning 20 foizini o‘qitish uchun imtiyozli ta’lim grantlari ajratiladi. Bunda talabalarning 5 foizini bepul o‘qitish, 5 foiziga 50 foizli, 10 foiziga 25 foizli to‘lov-kontrakt miqdorini to‘lab berish bo‘yicha imtiyozlar taqdim etiladi.
Eslatib o‘tamiz, 14-fevral kuni Jizzax viloyati hokimligida viloyat hokimi Ergash Soliyev va Hindiston delegatsiyasi rahbari Nagaraj Venkatesh Sambhram Jizzaxda Sambhram texnologiya instituti filialini ochish to‘g‘risida kelishuv memorandumini imzolagandi.
Ma’lumot uchun, Sambhram guruhi va uning filiali bo‘lgan Sambhram texnologiya instituti Hindistondagi oliy ta’lim muassasalari o‘rtasida birinchi o‘rinda turadi. Jahonning 31 mingdan ziyod oliy o‘quv yurtining orasida kuchli 300 talik qatorida.
Jizzaxda tashkil etilishi mo‘ljallanayotgan institutda 6 ta fakultet bo‘lishi ko‘zda tutilgan.
Izoh (0)