Surxondaryo hokimligi Qiziriqdagi masjid To‘ra Bobolovning topshirig‘i bilan buzilayotgani haqidagi xabarlarga munosabat bildirdi

Surxondaryo viloyati hokimligi axborot xizmati ijtimoiy tarmoqda “Surxondaryo viloyati hokimi To‘ra Bobolov Qiziriq tumani markazida joylashgan masjidni nega buzdirmoqchi?” sarlavhasi ostida tarqalgan xabarga rasmiy munosabat bildirdi.

Ma’lum qilinishicha, viloyat hokimi To‘ra Bobolov 26-iyun kuni Qiziriq tumanining “Rabatak” mahallasida bo‘lganida faollar tomonidan markaziy “Chilgaz ota” jome masjidi namozxonlar uchun torlik qilayotganini aytib, uning o‘rnida zamonaviy qulayliklarga ega, sig‘imi 3 ming kishilik yangi masjid qurish taklifi bildirilgan.

Viloyat hokimi masjiddagi shart-sharoitlar bilan tanishgach, faollarning taklifini qo‘llab-quvvatlagan. Masjid joylashgan hududda uni kengaytirishning imkoni yo‘qligi inobatga olinib, zamonaviy qulayliklarga ega yangi markaziy masjidni bunyod etish uchun boshqa joydan yer ajratish, bunisini mahalla namozxonlari uchun qoldirish haqida mutasaddilarga ko‘rsatma berilgan. “Chilgaz ota” jome masjidini buzdirish to‘g‘risida esa gap-so‘z bo‘lmagan.

“Yurtdoshlarimizdan aholi orasida turli mish-mishlar paydo bo‘lishiga, ularda salbiy fikr va ishonchsizlikni shakllantirishga olib keladigan ushbu mazmundagi yolg‘on xabarlarga ishonmaslikni so‘raymiz”, — deyiladi xabarda.

Eslatib o‘tamiz, qonunchilikda yolg‘on axborot tarqatganlik uchun javobgarlik belgilangan bo‘lib, shaxsning qadr-qimmati kamsitilishiga yoki uning obro‘sizlantirilishiga olib keladigan yolg‘on axborotni tarqatish, shu jumladan, OAVda, telekommunikatsiya tarmoqlarida yoki internet tarmog‘ida tarqatish – BHMning 50 baravari miqdorda jarima solishga, shunday harakatlar ma’muriy jazo qo‘llanilganidan keyin sodir etilsa, BHMning 150 baravarigacha (33 million 450 ming so‘m) miqdorida jarima yoki 240 soatgacha majburiy jamoat ishlari yoki 2 yilgacha axloq tuzatish ishlari yoki 2 yilgacha ozodlikni cheklash bilan jazolanishiga sabab bo‘ladi.

Avvalroq Shahrisabzda masjid hovlisida ayvon qurilishi nima sababdan to‘xtatilgani, Buxorodagi qishloq kutubxonasi 150 yillik tarixga ega masjid bo‘lib chiqqani to‘g‘risida xabar berilgandi.