O‘zbekiston va Turkiya ikki mamlakat o‘rtasidagi o‘zaro tovar aylanmasini yiliga 10 milliard dollarga yetkazishni rejalashtirmoqda. Bu haqda Turkiya vitse-prezidenti Fuat Oktay 28-iyun kuni Toshkentda bo‘lib o‘tgan Turkiya—O‘zbekiston iqtisodiy hamkorlik bo‘yicha hukumatlararo komissiyasi yig‘ilishida ma’lum qildi, deb xabar beradi Anadolu agentligi.
“2021-yilning oxiriga borib o‘zaro tovar aylanmasi 4 milliard dollarga, 2023-yilga borib 5 milliard dollarga yetadi”, — deydi Oktay.
Uning so‘zlariga ko‘ra, Toshkentga tashrifi yakunlari bo‘yicha ikki turkiyzabon davlatlar o‘rtasidagi hamkorlikni yanada chuqurlashtirishga qaratilgan 58 banddan iborat harakat rejasi kelishib olingan.
“Muloqotning muhim jihatlaridan biri, shuningdek, Turkiya va O‘zbekiston o‘rtasida imtiyozli savdo to‘g‘risida shartnomani imzolashdir. Anqara Toshkentni har tomonlama qo‘llab-quvvatlashga tayyor. Hamkorligimiz o‘zaro hurmat va manfaatli prinsiplarga asoslangan. Ishonchim komilki, 2021-yil o‘zbek-turk aloqalarining rivojlanish yili bo‘ladi”, — deydi Turkiya vitse-prezidenti.
Fuat Oktayning ma’lum qilishicha, 2021-yil oxiriga qadar Turkiya prezidenti Rajab Toyyib Erdo‘g‘onning Toshkentga tashrif buyurishi rejalashtirilgan. 28-iyun kuni Toshkentda o‘tkazilgan yig‘ilishda ushbu masala ham muhokama qilingan.
Eslatib o‘tamiz, 2020-yilning fevralida O‘zbekiston Prezidenti Shavkat Mirziyoyev Rajab Toyyib Erdo‘g‘onning taklifiga binoan 19-fevral kuni rasmiy tashrif bilan Turkiyaga borgandi. Turkiya prezidenti esa 2018-yil 29-aprel kuni davlat tashrifi bilan O‘zbekistonga kelgan edi.
Izoh (0)