Xonanda Jahongir Otajonovning ichki ishlar xodimlari haqida videomurojaati ijtimoiy tarmoqlarda tarqaldi. Unda Otajonov mashinasini jarima maydonidan ololmayotganini aytgan va organ xodimlariga o‘z munosabatini bildirgan. Toshkent shahar IIBB uning chiqishida tuhmat va haqorat qilish alomatlari mavjudligi sababli holatga tegishli tartibda huquqiy baho berilishini bildirdi.
Ma’lum qilinishicha, 17-iyun kuni Toshkent shahar IIBB Yo‘l harakati xavfsizligi xizmati inspektori Mirzo Ulug‘bek tumani, Oltintepa ko‘chasida harakatlanib kelayotgan Gentra’ni to‘xtatgan. Tekshiruv davomida mashinani Jahongir Otajonovning ukasi — Alisher Otajonov boshqaruv huquqini beruvchi hujjatlarsiz haydab ketayotgani aniqlangan. Shu sababli Gentra jarima maydoniga joylashtirilgan va ayni vaqtga qadar tegishli hujjatlar taqdim etilmayotganligi sababli vaqtincha saqlanmoqda.
Poytaxt IIBBning qayd etishicha, hozirda Jahongir Otajonov o‘zining davlat organlari xizmatchilariga nisbatan haqoratomuz videochiqishlari orqali yaqinlarining huquqbuzarliklarini yashirish, o‘zining maishiy muammolariga omma e’tiborini tortishga urinishlari namoyon bo‘lmoqda.
“Mazkur fuqaroning harakatlarida tuhmat va haqorat qilish alomatlari mavjud bo‘lganligi sababli holatga tegishli tartibda huquqiy baho beriladi va jamoatchilikka qo‘shimcha ravishda axborot taqdim etiladi”, — deyiladi xabarda.
Ma'lumot uchun, Ma’muriy javobgarlik to‘g‘risidagi kodeksning 41-moddasiga ko’ra, haqorat qilish, ya’ni shaxsning sha’ni va qadr-qimmatini qasddan kamsitish BHMning 20 baravaridan 40 baravarigacha (4,9 million so‘mdan 9,8 million so‘mgacha) miqdorda jarima solishga asos bo‘ladi.
Jinoyat kodeksining 140-moddasiga ko‘ra esa haqorat qilish, ya’ni shaxsning sha’ni va qadr-qimmatini beodoblik bilan qasddan tahqirlash, basharti shunday harakatlar uchun ma’muriy jazo qo’llanilgandan keyin sodir etilgan bo’lsa, BHMning 200 baravarigacha miqdorda jarima yoki 1 yilgacha axloq tuzatish ishlari bilan jazolanadi.
Eslatib o‘tamiz, Jahongir Otajonov 2020-yilning dekabrida san’atni tark etganini ma’lum qilgandi. 2021-yilning yanvarida navbatdagi prezidentlik saylovida o‘z nomzodini qo‘yishini ma’lum qilib, “Xalq manfaatlari” deb nomlangan yangi siyosiy partiya tuzish harakatiga tushdi va O‘zbekistonni har bir masalada O‘rta Osiyodagi eng zo‘r davlat qilish niyati borligini aytgandi.
Uning bu qaroriga ijtimoiy tarmoqlar foydalanuvchilari turlicha munosabat bildirdi. Kimdir undan siyosatchi chiqmasligini aytib, uni bu fikridan qaytarishga urindi, yana kimdir uni qo‘llab-quvvatladi. Izohlar orasida xonandaning sha’niga haqoratli so‘zlar yozib qoldirilgan holatlar ham uchradi.
Keyinchalik Jahongir Otajonov saylovda qatnashish istagidan qaytganini va partiya a’zoligidan chiqqanini ma’lum qildi.
Izoh (0)