Навоий вилояти Хатирчи туманида бир гуруҳ шахслар уларнинг қоидабузарлигини суратга олишда гумон қилинган фуқароларни дўппослаб, машинасига зарар етказди. Бу ҳақда Навоий вилояти ИИБ хабар қилди.
Қайд этилишича, 2021 йилнинг 29 июнь куни Хатирчи тумани «Кўксарой» маҳалласида яшовчи Ш.А. ҳамда ушбу маҳаллада яшовчи С.О. туман марказида таксичилик билан шуғулланувчи шахсларнинг автомашиналарининг давлат рақамларини суратга олган.
Шу вақтда туман марказида таксичилик билан шуғулланувчи бир неча шахслар уларни кўриб, улардан нима сабабдан суратга тушириб юрганини, бунинг учун уларга жарима белгиланаётганини маълум қилган.
Шунда Ш.А. ва С.О. машиналарнинг давлат рақамларини суратга туширмаганини айтгандан сўнг ушбу шахсларни туман марказида таксичилик билан шуғулланиб юрган шахслар уриб-дўппослаб, суратга олган телефон аппаратларини тортиб олиб, бошқариб юрган 85 Q 127 GA давлат рақамли Spark автомашинасининг бампер, ойна ва кузов қисмларига моддий зарар етказган.
Олиб борилган тезкор тадбир давомида ушбу шахсларнинг барчаси туман ИИБ биносига олиб келиниб, шахсига аниқлик киритилиб, бармоқ излари олиниб, ҳолат юзасидан батафсил тушунтириш хатлари олинган.
Мазкур ҳолат юзасидан Хатирчи туман ИИБ томонидан суриштирув ишлари давом эттирилмоқда.
Эслатиб ўтамиз, Ўзбекистонда 2021 йил 1 январдан бошлаб видеорегистраторлар билан бирга, видеокузатув ва тасвирга олиш техника воситалари ҳамда мобил қурилмалар орқали қайд этилган ҳуқуқбузарлик ҳолатлари акс этган видеоёзувлар махсус автоматлаштирилган техника воситалари орқали қайд этилган видеоёзувларга тенглаштирилган ҳамда Маъмурий жавобгарлик тўғрисидаги кодексда белгиланган тартибда кўриб чиқилиши белгиланган.
Изоҳ (0)