O‘zbekistonda “Avto 60 oy” ishi bo‘yicha jabr ko‘rgan fuqarolar pullarini olish uchun endi MIB tuman yoki shahar bo‘limlariga murojaat etishlari mumkin

Majburiy ijro byurosi fuqarolar uchun qulay bo‘lishi va ortiqcha ovoragarchilikning oldini olish maqsadida “Avto 60 oy” ishida jabr ko‘rganlarga pullarini qaytarish bo‘yicha ishchi guruh a’zolarini nafaqat MIB boshqarmalarida, balki fuqarolar yashayotgan MIB tuman va shahar bo‘limlarida ham tashkil etdi. Bu haqda “Daryo”ga Majburiy ijro byurosi matbuot xizmati xabar berdi.

Ma’lum qilinishicha, jinoyat ishlari bo‘yicha Chilonzor tuman sudining 2021-yil 29-martdagi ijro varaqasiga asosan “Avto 60 oy” MCHJ mansabdor shaxslari J.Bahodirov va boshqalarning jinoyat ishi bo‘yicha dastlabki tergov organi tomonidan xatlangan 28,6 milliard so‘m pul mablag‘larini 15 761 nafar undiruvchilarga yetkazilgan moddiy zararlarni qoplashga qaratish to‘g‘risidagi ijro hujjati byuroning Toshkent shahar boshqarmasi ish yurituviga kelib tushib, ijro ishi qo‘zg‘atilgani hamda Byuro markaziy apparati tashabbusi bilan byuro xodimlaridan iborat tarkibda ishchi guruhlar tashkil etilgani haqida muqaddam xabar berilgan.

Hozirda ishchi guruhlarga 8 mingga yaqin fuqarolar murojaat qilib, o‘zlariga tegishli hisob raqamlar haqidagi ma’lumotlarni taqdim qilgan.

Ariza taqdim etgan jami 4 012 nafar fuqaroga 9,5 milliard so‘mlik pul mablag‘lari o‘tkazib berildi.

Qolgan fuqarolar ham pullarini qaytarib olishlari uchun murojaat etishlari lozim.

Bu borada Majburiy ijro byurosi fuqarolar uchun yanada qulay bo‘lishi va ortiqcha ovoragarchilikning oldini olish maqsadida ishchi guruh a’zolarini nafaqat MIB boshqarmalarida, balki fuqarolar yashayotgan MIB tuman va shahar bo‘limlarida ham tashkil etdi.

Endi fuqarolar pullarini olish uchun MIB tuman yoki shahar bo‘limlariga ham murojaat etishlari mumkin.

Murojaat etish uchun Majburiy ijro byurosining viloyat boshqarmasi yoki o‘zi yashab kelayotgan tuman, shahar bo‘limlariga shaxsini tasdiqlovchi hujjatlar (fuqarolik pasporti) hamda plastik kartochkalari bilan (dushanba-juma kunlari soat 09:00 dan 18:00 ga qadar) murojaat qilishlari so‘raladi.

Ma’lum bo‘lishicha, hozirda 800 dan ortiq fuqarolar MIB organlariga “Avto 60 oy” MCHJdan jabr ko‘rgan shaxs sifatida zarar pullarini olish uchun murojaat etishgan bo‘lsa-da, ularning nomlari sud qarorlarida aks etmagan.

Ushbu fuqarolar bu masalada tergov va sud organlariga murojaat etishlari lozimligi qayd etildi.