Ўзбекистонда «Авто 60 ой» иши бўйича жабр кўрган фуқаролар пулларини олиш учун энди МИБ туман ёки шаҳар бўлимларига мурожаат этишлари мумкин

Мажбурий ижро бюроси фуқаролар учун қулай бўлиши ва ортиқча оворагарчиликнинг олдини олиш мақсадида «Авто 60 ой» ишида жабр кўрганларга пулларини қайтариш бўйича ишчи гуруҳ аъзоларини нафақат МИБ бошқармаларида, балки фуқаролар яшаётган МИБ туман ва шаҳар бўлимларида ҳам ташкил этди. Бу ҳақда «Дарё»га Мажбурий ижро бюроси матбуот хизмати хабар берди.

Маълум қилинишича, жиноят ишлари бўйича Чилонзор туман судининг 2021 йил 29 мартдаги ижро варақасига асосан «Авто 60 ой» МЧЖ мансабдор шахслари Ж.Баҳодиров ва бошқаларнинг жиноят иши бўйича дастлабки тергов органи томонидан хатланган 28,6 миллиард сўм пул маблағларини 15 761 нафар ундирувчиларга етказилган моддий зарарларни қоплашга қаратиш тўғрисидаги ижро ҳужжати бюронинг Тошкент шаҳар бошқармаси иш юритувига келиб тушиб, ижро иши қўзғатилгани ҳамда Бюро марказий аппарати ташаббуси билан бюро ходимларидан иборат таркибда ишчи гуруҳлар ташкил этилгани ҳақида муқаддам хабар берилган.

Ҳозирда ишчи гуруҳларга 8 мингга яқин фуқаролар мурожаат қилиб, ўзларига тегишли ҳисоб рақамлар ҳақидаги маълумотларни тақдим қилган.

Ариза тақдим этган жами 4 012 нафар фуқарога 9,5 миллиард сўмлик пул маблағлари ўтказиб берилди.

Қолган фуқаролар ҳам пулларини қайтариб олишлари учун мурожаат этишлари лозим.

Бу борада Мажбурий ижро бюроси фуқаролар учун янада қулай бўлиши ва ортиқча оворагарчиликнинг олдини олиш мақсадида ишчи гуруҳ аъзоларини нафақат МИБ бошқармаларида, балки фуқаролар яшаётган МИБ туман ва шаҳар бўлимларида ҳам ташкил этди.

Энди фуқаролар пулларини олиш учун МИБ туман ёки шаҳар бўлимларига ҳам мурожаат этишлари мумкин.

Мурожаат этиш учун Мажбурий ижро бюросининг вилоят бошқармаси ёки ўзи яшаб келаётган туман, шаҳар бўлимларига шахсини тасдиқловчи ҳужжатлар (фуқаролик паспорти) ҳамда пластик карточкалари билан (душанба-жума кунлари соат 09:00 дан 18:00 га қадар) мурожаат қилишлари сўралади.

Маълум бўлишича, ҳозирда 800 дан ортиқ фуқаролар МИБ органларига «Авто 60 ой» МЧЖдан жабр кўрган шахс сифатида зарар пулларини олиш учун мурожаат этишган бўлса-да, уларнинг номлари суд қарорларида акс этмаган.

Ушбу фуқаролар бу масалада тергов ва суд органларига мурожаат этишлари лозимлиги қайд этилди.