Senatning o‘n oltinchi yalpi majlisida oqova suv tozalash inshootlarida vujudga kelayotgan muammo va kamchiliklarning atrof-muhit hamda aholi salomatligiga ta’siri to‘g‘risida Vazirlar Mahkamasiga parlament so‘rovi yuborish masalasi ko‘rib chiqildi. Bu haqda Oliy Majlis yuqori palatasi matbuot xizmati xabar qildi.
Oqova suv tozalash inshootlarining ishlashi joylarda o‘rganilib, mamlakatning 5,6 million (17 foiz) aholisi oqova suv xizmati bilan ta’minlanganligi, shuningdek, bugungi kunda hududlardagi jami 58 ta yirik oqova suv tozalash inshootlarining 49 tasi (84 foiz), 8,6 ming kilometr oqova suv tarmoqlarining 1,9 ming kilometr (22 foiz) qismi ta’mirtalab holatda ekanligi ta’kidlandi.
Ushbu inshootlar uch bosqichda: mexanik, biologik va kimyoviy tozalash funksiyasini bajarishga ixtisoslashgan bo‘lib, aksariyat inshootlarda faqat mexanik tozalash ishlari bajarilmoqda.
Bundan tashqari, Toshkent shahrining Salor, Bo‘zsuv, Bektemir hamda Surxondaryo viloyatining Termiz shahri oqova suv tozalash inshootlari bugungi kunda ta’mirtalab holatga kelib qolgani aniqlangan.
Shu bilan birga, mahalliy oqova suv tozalash inshootlari talabga javob bermasdan kanalizatsiya tarmoqlariga oqovalarning me’yor darajasida tozalanmasdan tashlab yuborilayotganligi ma’lum bo‘lgan.
Respublikaning barcha viloyatlarida oqova suv tozalash inshootlari ta’mirtalab, malakali kadrlar yetishmasligi va mavjud jihozlarning eskirganligi sababli to‘liq foydalanilmasdan oqova suvlar zararsizlantirilmasdan inshootga yaqin bo‘lgan daryolar va soylarga oqizib yuborilmoqda.
Ushbu masala yuzasidan Oliy Majlis Senatining tegishli qarori qabul qilindi.
Bundan avval Oliy Majlis Senatida yangi qo‘mita tashkil etilgani, Navoiy shahri hududida bir necha kundan buyon badbo‘y hid tarqalgani to‘g‘risidagi xabarlarga munosabat bildirilgani hamda O‘zbekiston Ekologiya qo‘mitasi va uning tarkibidagi tashkilotlar 9,4 mlrd so‘mlik mablag‘ni noqonuniy sarflagani aniqlangani haqida xabar berilgandi.
Izoh (0)