Hisob palatasining 2021-yildagi nazorat ishlari rejasiga muvofiq 2017—2020-yillarda ajratilgan mablag‘lardan samarali foydalanish bo‘yicha o‘tkazgan o‘rganishida 2 ta OTMda 22,5 milliard so‘m o‘zlashtirilgani aniqlandi. Bu haqda palata matbuot xizmati xabar berdi.
Qarshi muhandislik-iqtisodiyot institutida hisoblangan ish haqi va stipendiyalarga nisbatan bankdan ortiqcha olingan 21 milliard so‘m naqd pullar buxgalteriya xodimlari tomonidan qalbaki vedomostlarni tuzish orqali o‘zlashtirilgan.
Jizzax politexnika institutida 1,5 milliard so‘m mablag‘lar plastik kartochkaga o‘tkazish orqali o‘zlashtirilgan.
Buxgalteriya xizmati mas’ullari o‘z tushuntirish xatlarida yuqorida ko‘rsatilgan mablag‘larni o‘zlashtirganlarini ko‘rsatib o‘tgan.
Aniqlangan holatlar bo‘yicha rasmiylashtirilgan hujjatlar o‘zlashtirilgan mablag‘larni o‘z joyiga tiklash va huquqiy baho berish uchun belgilangan tartibda Bosh prokuraturaga yuborilgan.
Qayd etilishicha, ayni paytda Oliy va o‘rta maxsus ta’limi vazirligida nazorat tadbiri davom ettirilmoqda, yakuniy ma’lumotlar bo‘yicha qo‘shimcha axborot beriladi.
Avvalroq O‘zbekiston Ekologiya qo‘mitasi va uning tarkibidagi tashkilotlar 9,4 milliard so‘mlik mablag‘ni noqonuniy sarflagani aniqlangani, O‘zbekistonda beshta vazirlik 61 milliard so‘mni talon-toroj qilishining oldi olingani haqida xabar berilgan edi.
Izoh (0)