Toshkent hayvonot bog‘ida aprel oxiridan mayning o‘rtasigacha xoldor bug‘ular, uzun yolli qo‘ylar, lamalar va ko‘plab uloqchalar dunyoga keldi, deb xabar beradi muassasa matbuot xizmati.
Ma’lum qilinishicha, hayvonot bog‘idagi lan (bug‘ularga mansub juft tuyoqli hayvon) va garna (kichik antilopa) ham bolalagan.
Bundan tashqari, 22-iyun kunida tibet qo‘tosi dunyoga kelgan bo‘lib, u ko‘zlarini ochay deb qolgan.
Tuyoqlilar bo‘limi boshlig‘i Botir Maqsudxo‘jayevning so‘zlariga ko‘ra, barcha hayvonlar onalari bag‘rida, sut bilan oziqlanyapti va o‘zlarini juda yaxshi his qilmoqda.
Avvalroq Toshkent hayvonot bog‘iga juda kam uchraydigan ikkita oq rangli sher bolalari olib kelingani to‘g‘risida xabar berilgandi.
Eslatib o‘tamiz, 2020-yilning yanvarida Germaniyaning dan pearlman Group kompaniyasi Toshkent hayvonot bog‘ini rekonstruksiya qilish loyihasini ishlab chiqishga yordam ko‘rsatishi ma’lum bo‘lgandi. Kompaniya Germaniya, Gruziya, Italiya, Buyuk Britaniya, Daniya, Janubiy Koreya va boshqa mamlakatlarda hayvonot bog‘larini rivojlantirish rejalari va dizaynlarini ishlab chiqqan. 2021-yilning fevralida esa bog‘ning modernizatsiya loyihasiga oid bir nechta konseptlar taqdim etilgan edi.
Izoh (0)