Asaka shahridagi UzAuto Motors zavodiga olib kelinayotgan po‘lat listlar talon-toroj qilindi, deya xabar bermoqda kompaniya matbuot xizmati.
Qayd etilishicha, 2021-yilning 12-iyun kuni UzAuto Motors’ning Asaka shahridagi zavodiga yetkazilgan yukda po‘lat listlarning bir qismi yetishmayotganligi aniqlandi.
Rossiyadagi “Severstal” kompaniyasining yuk vagonlari zavodga kirish paytida ko‘rikdan o‘tkazilganida vagondagi yuklardan birining qadog‘i buzilganligi ma’lum bo‘ldi.
Mazkur holat yuzasidan UzAuto Motors AJning komplayens xizmati tomonidan o‘tkazilgan xizmat tekshiruvi natijasiga ko‘ra, vagonga ortilgan po‘lat listlarning bir qismi kompaniyaga yetib kelgunga qadar noma’lum shaxslar tomonidan o‘g‘irlanganligi aniqlandi.
Qayd etilishicha, ishlab chiqarish standartlariga muvofiq, ushbu talon-toroj qilingan po‘lat listlar me’yor sarfiga muvofiq, 2030 ta Nexia-3 yoki 871 ta Gentra yoki 970 ta Labo avtomashinalari kuzov qismlarini ishlab chiqarish uchun ishlatilgan bo‘lardi.
Ushbu hodisa yuzasidan o‘tkazilgan xizmat tekshiruvi natijasida to‘plangan barcha materiallar aybdor shaxslarni aniqlash uchun hamda yuklar tashilishida ularning xavfsizligi va samarali qo‘riqlanishiga mas’ul bo‘lgan IIVning transportda xavfsizlikni ta’minlash bo‘linmalari xodimlarining xizmat vazifalarini qonuniy bajarganligiga huquqiy baho berish uchun Transport prokuraturasiga yuborildi.
Bundan avval O‘zbekiston Ekologiya qo‘mitasi va uning tarkibidagi tashkilotlar 9,4 mlrd so‘mlik mablag‘ni noqonuniy sarflagani aniqlangani, Buxoroda maktabni ta’mirlashda talon-torojlikka yo‘l qo‘ygan qurilish tashkiloti rahbari javobgarlikka tortilgani hamda O‘zbekistonda beshta vazirlik 61 mlrd so‘mni talon-toroj qilishining oldi olingani haqida xabar berilgandi.
Izoh (0)