Dunyo va o‘zbek sportiga oid 24-iyun tongining muhim xabarlari dayjesti bilan tanishing.
O‘zbekiston
O‘zbekiston futzal terma jamoasi bugun Venesuelaga qarshi o‘ynaydi. Xalqaro o‘rtoqlik maqomidagi bahs Toshkent vaqti bilan 19:00 da boshlanadi.
Misrda o‘tayotgan “Arab Cup U-20” musobaqasida ishtirok etayotgan O‘zbekiston U-18 terma jamoasi 24-iyun kuni Tunisga qarshi bahs olib boradi. Eldor Magdiyev shogirdlari dastlabki turda Saudiya Arabistoniga yutqazib qo‘ygandi.
“Ufa” Oston O‘runov transferi borasida “Spartak M”ga taklif yubordi
Moskvaliklar sport direktorining qayd etishicha, “Ufa” O‘runov uchun million yevrodan ko‘proq mablag‘ taklif qilgan, biroq ufaliklar bu summani 2022-yilda uchga bo‘lib to‘lashni taklif qilgan. O‘z navbatida “qizil-oqlar” bu taklifni rad etgan. “Spartak” O‘runov uchun mablag‘ bir yil ichida to‘lanishini va uning 70 foizi futbolchi “Ufa”ga yo‘l olgan kundan bir oy ichida berilishini xohlamoqda.
Jahon
Yevro—2020 haqidaMusobaqaning guruh bosqichi yakunlandi va barcha 1/8 final juftliklari ma’lum bo‘ldi. Ukraina terma jamoasi o‘z tarixida ilk bor Yevro pley-off bosqichiga chiqdi. Andrey Shevchenko shogirdlari chorak final ostonasida Shvetsiya bilan o‘ynaydi.
Krishtianu Ronaldu Portugaliya terma jamoasidagi gollari sonini 109 taga yetkazib oldi va bu borada eronlik Ali Daining afsonaviy rekordini takrorladi. Shuningdek, Ronalduning Yevro va JChdagi gollari 21 taga yetdi. Krishtianu Miroslav Klozeni (19) ortda qoldirgan holda bu borada ham rekordchi bo‘lib turibdi. Ronaldu Yevro guruh bosqichining barcha uch o‘yinida gol urgan ilk portugaliyalik futbolchiga aylandi.
Karim Benzema Fransiya terma jamoasi safida Yevroda dubl qayd etgan eng yoshi katta futbolchiga aylandi. 33 yosh-u 186 kunli Benzema bu borada Zinedin Zidanning (31 yosh-u 356 kun) rekordini yangiladi. Bu Karim uchun Fransiya terma jamoasi safida 2015-yilning oktabridan keyingi dastlabki gollar bo‘ldi.
Kopa Amerika—2021 davom etmoqda. Braziliya terma jamoasi 3-turda Kolumbiya ustidan irodali g‘alabani qo‘lga kiritdi va muddatidan avval guruhda birinchi o‘rinni naqd qildi. Ekvador va Peru o‘rtasidagi o‘yin esa 2:2 hisobidagi durang bilan yakun topdi.
FIFA “Barselona”ga kompensatsiya to‘laydi
Katalonlar hujumchisi Usmon Dembele Fransiya terma jamoasi safida jarohat oldi va 4 oyga safdan chiqdi. FIFA qoidalariga ko‘ra, futbolchi terma jamoasi safida xalqaro musobaqada jarohat olsa , tashkilot buning uchun klublarga kompensatsiya to‘laydi. Bu qoida futbolchi 28 kundan uzoq muddatga safdan chiqqanda amal qiladi, jarohatning har bir kuni uchun 20,5 ming yevrodan to‘lanadigan to‘lovning maksimal miqdori 7,5 million yevrodan oshmaydi. Shu tariqa agar Dembele 4 oy maydonga tusha olmaydigan bo‘lsa, “Barselona” 2,5 million yevro atrofidagi kompensatsiyaga ega bo‘ladi.
“Manchester Yunayted” Pogbani sotish niyatida emas
Mankunianlar 28 yoshli futbolchi transferi borasida hech qaysi klub bilan muzokara olib bormayapti. Futbolchi ayni damda 50 million yevroga baholanmoqda. “Manchester Yunayted” esa uni bu miqdordagi pulga sotmoqchi emas, deya xabar qilmoqda Fabrisio Romano.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)