Рекордларни қаторлаштираётган Роналду, Остон Ўрунов учун курашаётган «Уфа» ва Зиданни ортда қолдирган Бензема. Энг сўнгги спорт янгиликлари

Дунё ва ўзбек спортига оид 24 июнь тонгининг муҳим хабарлари дайжести билан танишинг.

Ўзбекистон

Мисрда ўтаётган «Arab Cup U-20» мусобақасида иштирок этаётган Ўзбекистон U-18 терма жамоаси 24 июнь куни Тунисга қарши баҳс олиб боради. Элдор Магдиев шогирдлари дастлабки турда Саудия Арабистонига ютқазиб қўйганди.

«Уфа» Остон Ўрунов трансфери борасида «Спартак М»га таклиф юборди

Москваликлар спорт директорининг қайд этишича, «Уфа» Ўрунов учун миллион евродан кўпроқ маблағ таклиф қилган, бироқ уфаликлар бу суммани 2022 йилда учга бўлиб тўлашни таклиф қилган. Ўз навбатида «қизил-оқлар» бу таклифни рад этган. «Спартак» Ўрунов учун маблағ бир йил ичида тўланишини ва унинг 70 фоизи футболчи «Уфа»га йўл олган кундан бир ой ичида берилишини хоҳламоқда.

Жаҳон

Мусобақанинг гуруҳ босқичи якунланди ва барча 1/8 финал жуфтликлари маълум бўлди. Украина терма жамоаси ўз тарихида илк бор Евро плей-офф босқичига чиқди. Андрей Шевченко шогирдлари чорак финал остонасида Швеция билан ўйнайди.

Криштиану Роналду Португалия терма жамоасидаги голлари сонини 109 тага етказиб олди ва бу борада эронлик Али Даининг афсонавий рекордини такрорлади. Шунингдек, Роналдунинг Евро ва ЖЧдаги голлари 21 тага етди. Криштиану Мирослав Клозени (19) ортда қолдирган ҳолда бу борада ҳам рекордчи бўлиб турибди. Роналду Евро гуруҳ босқичининг барча уч ўйинида гол урган илк португалиялик футболчига айланди.

Карим Бензема Франция терма жамоаси сафида Еврода дубль қайд этган энг ёши катта футболчига айланди. 33 ёш-у 186 кунли Бензема бу борада Зинедин Зиданнинг (31 ёш-у 356 кун) рекордини янгилади. Бу Карим учун Франция терма жамоаси сафида 2015 йилнинг октябридан кейинги дастлабки голлар бўлди.

Копа Америка—2021 давом этмоқда. Бразилия терма жамоаси 3-турда Колумбия устидан иродали ғалабани қўлга киритди ва муддатидан аввал гуруҳда биринчи ўринни нақд қилди. Эквадор ва Перу ўртасидаги ўйин эса 2:2 ҳисобидаги дуранг билан якун топди.

ФИФА «Барселона»га компенсация тўлайди

Каталонлар ҳужумчиси Усмон Дембеле Франция терма жамоаси сафида жароҳат олди ва 4 ойга сафдан чиқди. ФИФА қоидаларига кўра, футболчи терма жамоаси сафида халқаро мусобақада жароҳат олса , ташкилот бунинг учун клубларга компенсация тўлайди. Бу қоида футболчи 28 кундан узоқ муддатга сафдан чиққанда амал қилади, жароҳатнинг ҳар бир куни учун 20,5 минг евродан тўланадиган тўловнинг максимал миқдори 7,5 миллион евродан ошмайди. Шу тариқа агар Дембеле 4 ой майдонга туша олмайдиган бўлса, «Барселона» 2,5 миллион евро атрофидаги компенсацияга эга бўлади.

«Манчестер Юнайтед» Погбани сотиш ниятида эмас

Манкунианлар 28 ёшли футболчи трансфери борасида ҳеч қайси клуб билан музокара олиб бормаяпти. Футболчи айни дамда 50 миллион еврога баҳоланмоқда. «Манчестер Юнайтед» эса уни бу миқдордаги пулга сотмоқчи эмас, дея хабар қилмоқда Фабрисио Романо.