Amerikaning Moderna kompaniyasi koronavirusga qarshi vaksinasiga Spikevax deb yangi nom berdi. Bu haqda Yevropa dori-darmon agentligi veb-saytiga tayanib Meduza xabar berdi.
Foto: Reuters
Ilgari preparat kompaniya nomi bilan bir xil — Moderna deb atalardi. Biroq vaksinani ishlab chiqaruvchilar endi preparatni qayta nomlamoqda, chunki kompaniya nafaqat vaksinani, balki boshqa ko‘plab dori-darmonlarni ham ishlab chiqaradi.
Moderna Yevropa Ittifoqida tasdiqlangan va o‘z vaksinasiga alohida tijoriy nom berayotgan to‘rtta vaksina ishlab chiqaruvchi kompaniyaning uchinchisi. Xususan, Pfizer / BioNTech kompaniyasi Comirnaty nomi ostida, AstraZeneca esa Vaxzervia nomi bilan vaksina ishlab chiqaradi. Janssen kompaniyasining (Johnson & Johnson korporatsiyasi tarkibiga kiruvchi) preparati hali alohida nomga ega emas.
Avvalroq 2021-yilgi Jahon vaksinasi kongressi mutaxassislari koronavirusga qarshi eng yaxshi vaksina sifatida Moderna kompaniyasi preparatini tanlagan edi.
Moderna o‘z vaksinasini AQShda 2020-yilning 16-dekabrida tasdiqlatgan edi, bir necha kun o‘tib ushbu preparat Yevropa Ittifoqida ham ma’qullangan. Shuningdek, kompaniya Buyuk Britaniya, Kanada, Yaponiya, Janubiy Koreya, Shveysariya, Isroil va boshqa bir qator davlatlar bilan vaksina yetkazib berish bo‘yicha shartnoma imzolagan.
30-aprel kuni Jahon sog‘liqni saqlash tashkiloti (JSST) Moderna vaksinasini favqulodda vaziyatlarda foydalanish uchun tavsiya etilganlar ro‘yxatiga qo‘shdi. Tashkilot xabariga ko‘ra, preparat to‘g‘risidagi ma’lumotlar immunizatsiya bo‘yicha strategik maslahat guruhi (SAGE) tomonidan o‘rganilgan.
Ular preparatni 18 va undan katta yoshdagilarga qo‘llashni tavsiya qildi. SAGE ma’lumotlariga ko‘ra, vaksina samaradorligi 94,1 foizni tashkil etgan.
