Американинг Moderna компанияси коронавирусга қарши вакцинасига Spikevax деб янги ном берди. Бу ҳақда Европа дори-дармон агентлиги веб-сайтига таяниб Meduza хабар берди.
Илгари препарат компания номи билан бир хил — Moderna деб аталарди. Бироқ вакцинани ишлаб чиқарувчилар энди препаратни қайта номламоқда, чунки компания нафақат вакцинани, балки бошқа кўплаб дори-дармонларни ҳам ишлаб чиқаради.
Moderna Европа Иттифоқида тасдиқланган ва ўз вакцинасига алоҳида тижорий ном бераётган тўртта вакцина ишлаб чиқарувчи компаниянинг учинчиси. Хусусан, Pfizer / BioNTech компанияси Comirnaty номи остида, AstraZeneca эса Vaxzervia номи билан вакцина ишлаб чиқаради. Janssen компаниясининг (Johnson & Johnson корпорацияси таркибига кирувчи) препарати ҳали алоҳида номга эга эмас.
Аввалроқ 2021 йилги Жаҳон вакцинаси конгресси мутахассислари коронавирусга қарши энг яхши вакцина сифатида Moderna компанияси препаратини танлаган эди.
Moderna ўз вакцинасини АҚШда 2020 йилнинг 16 декабрида тасдиқлатган эди, бир неча кун ўтиб ушбу препарат Европа Иттифоқида ҳам маъқулланган. Шунингдек, компания Буюк Британия, Канада, Япония, Жанубий Корея, Швейцария, Исроил ва бошқа бир қатор давлатлар билан вакцина етказиб бериш бўйича шартнома имзолаган.
30 апрель куни Жаҳон соғлиқни сақлаш ташкилоти (ЖССТ) Moderna вакцинасини фавқулодда вазиятларда фойдаланиш учун тавсия этилганлар рўйхатига қўшди. Ташкилот хабарига кўра, препарат тўғрисидаги маълумотлар иммунизация бўйича стратегик маслаҳат гуруҳи (SAGE) томонидан ўрганилган.
Улар препаратни 18 ва ундан катта ёшдагиларга қўллашни тавсия қилди. SAGE маълумотларига кўра, вакцина самарадорлиги 94,1 фоизни ташкил этган.
Изоҳ (0)