Efiopiya, Madagaskar, Janubiy Sudan va Yamanda yuz berayotgan qattiq ocharchilik dunyo bo‘ylab mazkur muammo ko‘lami oshganidan dalolat beradi. Bu haqda Birlashgan Millatlar Tashkilotining (BMT) Jahon oziq-ovqat dasturi hisobotida aytilgan.
Hisobotga ko‘ra, ushbu mamlakatlarda 584 ming kishi ochlikdan aziyat chekayotgani qayd etilgan. Shu bilan birga, 43 ta davlatda yana 41 million aholi (2019-yilda 27 million edi) ochlik yoqasida turibdi.
Tashkilotning ta’kidlashicha, bu holatning sababi mahalliy ziddiyatlar, iqlim o‘zgarishi, shuningdek, inqiroz, valyutaning qadrsizlanishi, asosiy oziq-ovqat mahsulotlari narxlarining keskin ko‘tarilishi kabi iqtisodiy jarayonlar hamdir.
Bunga misol sifatida BMT Livan, Nigeriya, Sudan, Venesuela va Zimbabve davlatlarini keltirdi, ushbu mamlakatlarda inflyatsiya, ayniqsa, aholining ahvolini og‘irlashtirgan.
Tashkilot 2021-yil Jahon oziq-ovqat dasturi 139 million kishini qamrab oladigan eng yirik qo‘llab-quvvatlash operatsiyasini o‘tkazayotganini va shu sababli dastur moliyalashtirilishga juda muhtoj ekanini qayd etdi.
Avvalroq BMT dunyoda och odamlar soni besh yil ichidagi maksimal darajaga yetganini aytgan — 2020-yilda Burkina-Faso, Janubiy Sudan va Yamanda 133 mingga yaqin odam “halokatli” oziq-ovqat yetishmovchiligi sharoitida bo‘lgan.
Izoh (0)