Hindiston hukumati koronavirusning yangi — “delta plyus” shtammi xavfidan ogohlantirdi

Hindiston Sog‘liqni saqlash vazirligi aholi zich joylashgan Maxarashtra, Kerala va Madxya-Pradesh shtatlari hokimiyatlarini koronavirusning “delta-plyus” deb nomlangan yangi turi xavfidan ogohlantirdi. Bu tur ko‘plab mamlakatlarda tarqalayotgan “delta” shtammning yangi varianti, deb yozadi “RBK”.

Hindiston hukumati matbuot xizmati COVID-19’ni o‘rganayotgan INSACOG ilmiy markazi tomonidan taqdim etilgan tadqiqot natijalarini ma’lum qildi. Bir necha o‘nlab hind laboratoriyalari olimlarining fikriga ko‘ra, “delta-plyus” haqiqatan ham jiddiy xavotir uyg‘otmoqda, chunki u tarqalish tezligi, o‘pka hujayralariga kuchli ta’sir ko‘rsatishi bilan avvalgi shtammdan farq qiladi. Olimlar, shuningdek, yangi shtamm antitanalar yaratgan himoyani yengib o‘tishga qodir deb taxmin qildi.

Shu munosabat bilan Hindistonning bir qator shaharlari ma’murlariga koronavirusga qarshi choralarni kuchaytirish, test va emlash hajmini ko‘paytirish bo‘yicha tavsiyalar berildi. Shuningdek, yangi shtamm bilan kasallanganlarni qo‘shimcha ravishda tekshirish tavsiya etiladi.

Koronavirusning “hindcha” (delta) shtammi mutatsiyasi bo‘lgan “delta-plyus” birinchi bo‘lib Hindistonning Maxarashtra shtatida aniqlangan edi.

Eslatib o‘tamiz, 2020-yilning oktabr oyida Hindistonda koronavirusning delta varianti topilgan. O‘shandan beri ushbu shtamm mamlakat chegaralaridan ancha uzoqqa tarqaldi va ko‘plab mamlakatlarda, shu jumladan, Yevropa va Osiyoda qayd etildi.

Avvalroq Jahon sog‘liqni saqlash tashkiloti koronavirusning delta varianti butun dunyoda ustunlikka erishayotgani haqida ogohlantirgandi. Ta’kidlanishicha, ushbu tur dunyoning 80 dan ortiq davlatida aniqlanib, tarqalib borgani sari ko‘proq mutatsiyaga uchramoqda.