Tojikiston Davlat milliy xavfsizlik qo‘mitasi (DMXQ) “Tolibon” harakatining Tojikiston va Afg‘oniston o‘rtasidagi Qunduz viloyati joylashgan “Sherxon-Bandar” nazorat o‘tkazish punktiga hujumi yuzasidan izoh berdi, deb yozadi Asia-Plus. Hujum oqibatida afg‘onistonlik harbiylar yaralangan va o‘ldirilgan, shuningdek, Afg‘oniston hukumat qo‘shinlarining 130 dan ortiq harbiy xizmatchilari Tojikiston hududiga o‘tgan edi.
Tojikiston chegara qo‘shinlari xabar berishicha, 21-iyun kuni “Tolibon” harakatining qurollangan guruhi Afg‘onistonning Qunduz viloyatidagi Sherxon-Bandar chegara komissariatiga hujum qilgan.
“22-iyun kuni 09:00 gacha davom etgan qurolli to‘qnashuv oqibatida hujumga dosh bera olmasdan, Afg‘oniston Islom Respublikasi hukumat qo‘shinlarining 134 nafar harbiy xizmatchisi ‘Panj’ chegara otryadining 3 va 4-zastavalari orqali Tojikiston Respublikasi hududiga chekinishga majbur bo‘ldi”, — deyiladi bayonotda.
Ta’kidlanishicha, tojikistonlik chegarachilar, insoniylik va ahil qo‘shnichilik tamoyillariga amal qilgan holda, davlat chegarasini yorib kirgan afg‘onistonlik harbiylarga hech qanday to‘siqsiz Tojikiston hududiga o‘tishga ruxsat bergan. Afg‘oniston harbiy xizmatchilari orasida 4 kishi yaralangan va bir kishi halok bo‘lgan.
Tojikiston DMXQ qayd etishicha, tojik-afg‘on chegarasidagi vaziyat keskin deb baholanmoqda, “Sherxon-Bandar” hududida yaralangan, halok bo‘lgan va asirga olingan afg‘on harbiy xizmatchilarining umumiy soni — 100 kishigacha.
Tasdiqlangan ma’lumotga ko‘ra, so‘nggi o‘n kundan buyon Afg‘onistonning Tojikiston bilan chegaradosh bo‘lgan to‘rtta viloyatida hukumat qo‘shinlari va “Tolibon” harakati o‘rtasida jangovar to‘qnashuvlar davom etmoqda.
Natijada Tahor viloyatidagi Chaxyob, Yangi Qal’a, Darkad, Dashti Qal’a, Xo‘jagor uyezdlari, Qunduz viloyatidagi Dashti Archi, Imom Sohib va Qal’ai Zol uyezdlari, shuningdek, “Sherxon-Bandar” va “Kokul” nazorat-o‘tkazish punktlari “Tolibon” harakati nazorati ostiga o‘tdi.
Sherxon-Bandar Tojikiston va Afg‘oniston o‘rtasidagi muhim savdo va yuk tushirish-ortish punkti hisoblanadi, u orqali Janubiy va Janubi-Sharqiy Osiyodan, shu jumladan, Pokiston va Erondan Tojikistonning bojxona importi o‘tadi.
Ushbu chegara posti Tojikistonning Xatlon viloyatining Panj tumani hamda Afg‘onistonning Qunduz provinsiyasidagi Imom Sohib tumani oralig‘ida joylashgan. Imom Sohib tumanining o‘zi ham “Tolibon” harakati tomonidan egallab olingan.
Avvalroq O‘zbekiston Afg‘oniston bilan chegara yopilishini ma’lum qilgandi. Afg‘onistonda koronavirus infeksiyasi bilan bog‘liq epidemiologik vaziyat keskinlashayotganini inobatga olib, o‘zbek-afg‘on davlat chegarasi orqali fuqarolarning harakatlanishini vaqtincha to‘xtatishga qaror qilindi.
Izoh (0)