Moskvada 22-iyun kuni havo harorati 33,7 darajaga yetdi. Bu meteorologik kuzatuvlar tarixidagi rekord, deya xabar berdi Moskva meteorologiya idorasi bosh mutaxassisi Tatyana Pozdnyakova “RBK”ga.
“Bugun kunduzi 33,7 daraja harorat qayd etildi. Bundan avval 1917-yilda Moskvada 31,8 darajali rekord qayd etilgan edi”, — deya aniqlik kiritdi mutaxassis.
“Fobos” ob-havo markazining yetakchi mutaxassisi Yevgeniy Tishkovetsning ma’lum qilishicha, Moskva markazidagi Balchug orolida 34,8 daraja qayd etilgan. Sinoptikning ta’kidlashicha, shaharda jazirama yakshanba kunigacha davom etadi va yaqin kunlarda harorat bo‘yicha yangi rekordlar qayd etilishi kutilmoqda.
22-iyun kuni Tishkovets Moskva iqlim va axborot meteorologik stansiyasida tushgacha termometr ustuni 31,9 darajaga ko‘tarilganini aytdi. Pozdnyakova soat 13:00 da 32,3 daraja harorat haqida xabar qildi, shu bilan birga issiqlik keyingi soatlarda kuchayishidan ogohlantirdi.
22-iyun uchun bu 1879-yildan buyon olib boriladigan meteorologik kuzatuvlar tarixidagi eng yuqori haroratdir. So‘nggi marta bunday rekord 1917-yilda qayd etilgan — o‘shanda termometr ustuni 31,8 darajaga ko‘tarilgan.
Shuningdek, Sankt-Peterburg ketma-ket to‘rtinchi kun ob-havo bo‘yicha rekordni yangilamoqda. Bu haqda hudud bosh sinoptigi Aleksandr Kolesov “Interfaksga” ma’lum qildi.
“Sankt-Peterburgda ketma-ket to‘rtinchi kun rekord. Havo harorati allaqachon plyus 33,3 darajaga yetdi, bunga qadar 1917-yilning shu kunida harorat maksimal 32,5 darajadan oshgan”, — deya u shaharda harorat ko‘tarilishda davom etayotganini ta’kidladi.
Anomal issiqlik Peterburgga 19-iyun kuni kirib keldi. O‘sha kuni termometrlar plyus 30,7 darajaga yetib, 1905-yilgi rekordni yangiladi. 20-iyun kuni shimoliy poytaxtda harorat plyus 31,8 darajani tashkil etdi, bu 2006-yildagi eng yuqori ko‘rsatkichdan ham baland. 2006-yilgi rekord 21-iyun kuni ham yangilandi. Sinoptiklarning fikriga ko‘ra, shaharda yuqori harorat hafta oxirigacha davom etadi.
Gidrometeorologiya markazining ma’lumotlariga ko‘ra, hozirgi kunda Rossiyada anomal issiqlik markazi ikkita hudud — mamlakatning Yevropa qismida va Uzoq Sharqda shakllangan. Ular orasida G‘arbiy Sibirda havo, aksincha, sovuq. Mamlakatning Yevropa hududida havo harorati normal ko‘rsatkichlardan 10 daraja, Uzoq Sharqda esa 12 daraja yuqori. Krasnoyarsk o‘lkasida, aksincha, bu odatdagidan 4-7 darajagacha past.
Anomal issiqlik kelib chiqishiga uchta omil sabab bo‘lgan: antisiklon, yoz faslida kunning maksimal davomiyligi va ochiq havo. Sinoptiklarning fikriga ko‘ra, ushbu ob-havo hafta oxirigacha saqlanib qoladi.
Izoh (0)