Эфиопия, Мадагаскар, Жанубий Судан ва Яманда юз бераётган қаттиқ очарчилик дунё бўйлаб мазкур муаммо кўлами ошганидан далолат беради. Бу ҳақда Бирлашган Миллатлар Ташкилотининг (БМТ) Жаҳон озиқ-овқат дастури ҳисоботида айтилган.
Ҳисоботга кўра, ушбу мамлакатларда 584 минг киши очликдан азият чекаётгани қайд этилган. Шу билан бирга, 43 та давлатда яна 41 миллион аҳоли (2019 йилда 27 миллион эди) очлик ёқасида турибди.
Ташкилотнинг таъкидлашича, бу ҳолатнинг сабаби маҳаллий зиддиятлар, иқлим ўзгариши, шунингдек, инқироз, валютанинг қадрсизланиши, асосий озиқ-овқат маҳсулотлари нархларининг кескин кўтарилиши каби иқтисодий жараёнлар ҳамдир.
Бунга мисол сифатида БМТ Ливан, Нигерия, Судан, Венесуэла ва Зимбабве давлатларини келтирди, ушбу мамлакатларда инфляция, айниқса, аҳолининг аҳволини оғирлаштирган.
Ташкилот 2021 йил Жаҳон озиқ-овқат дастури 139 миллион кишини қамраб оладиган энг йирик қўллаб-қувватлаш операциясини ўтказаётганини ва шу сабабли дастур молиялаштирилишга жуда муҳтож эканини қайд этди.
Аввалроқ БМТ дунёда оч одамлар сони беш йил ичидаги максимал даражага етганини айтган — 2020 йилда Буркина-Фасо, Жанубий Судан ва Яманда 133 мингга яқин одам «ҳалокатли» озиқ-овқат етишмовчилиги шароитида бўлган.
Изоҳ (0)