22-iyun kuni Tashqi ishlar vazirligi O‘zbekistondagi laboratoriyalar biologik qurol ishlab chiqarishga mo‘ljallangani haqidagi xabarlarni rad etib, bayonot bilan chiqdi.
O‘zbekiston so‘nggi vaqtlarda O‘zbekistonning G‘arb davlatlari bilan bioxavfsizlik sohasidagi hamkorligi go‘yoki yaqin joylashgan davlatlar uchun xavf tug‘dirayotgani borasidagi asossiz bayonotlar tarqalishi kuzatilayotganini qayd etadi.Eslatib o‘tamiz, 2021-yilning may oyida “Sputnik O‘zbekiston” nashri epidemiolog shifokor, Rossiya davlat Dumasi deputati Gennadiy Onishenko bilan intervyuni e’lon qilgandi. Unda “ayrim MDH davlatlari va Gruziyada joylashgan Pentagon nazorati ostidagi ilmiy laboratoriyalar rasmiy Moskvaning jiddiy xavotirlanishiga sabab bo‘lmoqda” va “Rossiyada ushbu markazlarda xavfli infeksiyalarni o‘rganish maqsadi ostida biologik qurol ishlab chiqilayotganidan xavotirlanishmoqda” — deb aytiladi.Bir qator OAVda O‘zbekistondagi mavjud laboratoriyalarning go‘yoki biologik qurol ishlab chiqarishga mo‘ljallanganligi to‘g‘risida tarqalayotgan ma’lumotlarning mutlaqo haqiqatga to‘g‘ri kelmasligiga e’tibor qaratamiz.
Shuni ta’kidlash kerakki, ushbu laboratoriyalar faqat diagnostik tadqiqotlar o‘tkazish va tinchlik maqsadlaridagina foydalanish uchun mo‘ljallangan.
Bundan tashqari, O‘zbekiston Bakteriologik va toksik qurol-yarog‘larni taqiqlash to‘g‘risidagi Konvensiya ishtirokchisi sifatida biologik qurol-yarog‘larni ishlab chiqarish va to‘plashning taqiqlanishini ta’minlaydi.
O‘zbekistonga nisbatan bildirilgan har qanday asossiz bayonotlar ikki tomonlama munosabatlarda muayyan keskinlikni keltirib chiqaradi va eng muhimi, o‘zaro ishonchga asoslangan davlatlararo muloqotga zarar yetkazadi, deb hisoblaymiz.
O‘zbekiston Tashqi ishlar vazirligi
“Gazeta.uz”ning yozishicha, 2016-yil oktabr oyida AQShning O‘zbekistondagi elchixonasi AQSh Bioterrorizm xavflarini kamaytirish agentligi (DTRA) ishtirokida Urganchda mintaqaviy diagnostika laboratoriyasini ochgan. 2017-yil aprelida Toshkentda AQSh Kasalliklarni nazorat qilish va profilaktika qilish markazi (CDC) ko‘magida Mikroblarga qarshi preparatlarning rezistentligiga qarshi kurash milliy markazi ochilgan edi.
Izoh (0)