22 июнь куни Ташқи ишлар вазирлиги Ўзбекистондаги лабораториялар биологик қурол ишлаб чиқаришга мўлжаллангани ҳақидаги хабарларни рад этиб, баёнот билан чиқди.
Ўзбекистон сўнгги вақтларда Ўзбекистоннинг Ғарб давлатлари билан биохавфсизлик соҳасидаги ҳамкорлиги гўёки яқин жойлашган давлатлар учун хавф туғдираётгани борасидаги асоссиз баёнотлар тарқалиши кузатилаётганини қайд этади.Эслатиб ўтамиз, 2021 йилнинг май ойида «Спутник Ўзбекистон» нашри эпидемиолог шифокор, Россия давлат Думаси депутати Геннадий Онишенко билан интервьюни эълон қилганди. Унда «айрим МДҲ давлатлари ва Грузияда жойлашган Пентагон назорати остидаги илмий лабораториялар расмий Москванинг жиддий хавотирланишига сабаб бўлмоқда» ва «Россияда ушбу марказларда хавфли инфекцияларни ўрганиш мақсади остида биологик қурол ишлаб чиқилаётганидан хавотирланишмоқда» — деб айтилади.Бир қатор ОАВда Ўзбекистондаги мавжуд лабораторияларнинг гўёки биологик қурол ишлаб чиқаришга мўлжалланганлиги тўғрисида тарқалаётган маълумотларнинг мутлақо ҳақиқатга тўғри келмаслигига эътибор қаратамиз.
Шуни таъкидлаш керакки, ушбу лабораториялар фақат диагностик тадқиқотлар ўтказиш ва тинчлик мақсадларидагина фойдаланиш учун мўлжалланган.
Бундан ташқари, Ўзбекистон Бактериологик ва токсик қурол-яроғларни тақиқлаш тўғрисидаги Конвенция иштирокчиси сифатида биологик қурол-яроғларни ишлаб чиқариш ва тўплашнинг тақиқланишини таъминлайди.
Ўзбекистонга нисбатан билдирилган ҳар қандай асоссиз баёнотлар икки томонлама муносабатларда муайян кескинликни келтириб чиқаради ва энг муҳими, ўзаро ишончга асосланган давлатлараро мулоқотга зарар етказади, деб ҳисоблаймиз.
Ўзбекистон Ташқи ишлар вазирлиги
«Gazeta.uz»нинг ёзишича, 2016 йил октябрь ойида АҚШнинг Ўзбекистондаги элчихонаси АҚШ Биотерроризм хавфларини камайтириш агентлиги (DTRA) иштирокида Урганчда минтақавий диагностика лабораториясини очган. 2017 йил апрелида Тошкентда АҚШ Касалликларни назорат қилиш ва профилактика қилиш маркази (CDC) кўмагида Микробларга қарши препаратларнинг резистентлигига қарши кураш миллий маркази очилган эди.
Изоҳ (0)