Qarshidan Toshkentga avtomobil yukxonasida olib ketilayotgan iste’molga yaroqsiz go‘sht mahsulotlari yo‘q qilindi. Bu haqda IIV YHXBB axborot xizmati xabar berdi.
Ma’lum qilinishicha, 22-iyun kuni soat 01:30 larda Qashqadaryo viloyati Chiroqchi tumani hududida joylashgan “Umakay” YPX maskanida xizmat olib borgan YPX xodimi tomonidan Qarshi—Toshkent yo‘nalishi bo‘ylab harakatlanib kelgan Kia Carnival rusumli avtomobil to‘xtatilib, tekshirilgan. Tekshiruv davomida mashina yukxonasida to‘q qizil rangli, no’malum hayvonga tegishli bo‘lgan jami og‘irligi 460 kilogramm go‘sht mahsulotlari borligi aniqlangan.
Aniqlangan mahsulotlar Chiroqchi tumani veterinariya bo‘limining laboratoriyasida tekshirilgan va ular iste’molga yaroqsizligi aniqlanib, belgilangan tartibda yo‘q qilingan.
Avvalroq Buxorodan Toshkentga 3 tonnaga yaqin iste’molga yaroqsiz go‘sht olib ketilayotgani aniqlangani, Samarqandda iste’molga yaroqsiz bo‘lgan qariyb 200 kilogramm, Qashqadaryoda esa 600 kilogramm shunday go‘sht yo‘q qilingani haqida xabar berilgan edi.
Izoh (0)