“MMA’ning o‘zi meni tanlagan”. Mahmud Murodov MMA’dagi kumiri, sevimli bokschisi, Habib va muvaffaqiyat yo‘li haqida

O‘zbekistonlik UFC jangchisi Mahmud Murodov Russia Today nashriga intervyu berdi. Unda sportchi eng katta kamchiligi, MMA’da hurmat qiladigan shaxslari va boks bo‘yicha sobiq chempion Floyd Meyvezer bilan qanday tanishib qolgani haqida aytib o‘tdi.

Yig‘inlarga qancha vaqt sarflashi haqida

Avvalo 3 oylik lager kutib turibdi. UFC’dagi birinchi jangimga 8 kun, ikkinchisiga — 2 hafta, uchinchisiga 4 hafta tayyorgarlik ko‘rganman. Agar o‘zimni formada ushlab tursam 6—7 hafta yetarli, deb o‘ylayman. Qayerda bo‘lishimdan qat’i nazar — Chexiyadami, Polshadami yoki O‘zbekistonda — bir kunda kamida bir marta, dam olish kunlarisiz shug‘ullanaman. Toshkentda 2 hafta, tog‘larda 1 hafta bo‘laman, keyin ortga qaytaman. Undan keyin sparring janglari uchun Polshaga 6 haftalik muddatga uchib ketaman. U yerda Jerald Mershart bilan bo‘ladigan jangga tayyorgarlik ko‘raman.

Jangovar sambo — ilk shug‘ullangan sport turi emasligi haqida

Men zarbalarga tayanib jang qilaman, birinchi shug‘ullangan sport turim kikboks bo‘lgan. Rossiyaga kelganimdan so‘ng sambo bilan shug‘ullana boshladim. Otam avtohalokatga uchradi va akam bilan 17-18 yoshimizda Tomskka ishlashga ketishga to‘g‘ri keldi. U yerda turnirlarda qatnasha boshladim, Jahon chempionatlari sovrindorlari bilan, murabbiy Rudik Aslanyan bilan tanishdim. Sport tufayli men shu kungacha yetib keldim. Oldimda ikkita yo‘l bor edi: yo sport, yoki bekorchilik.

Nega MMA’ni tanlagani haqida

Bu haqida ko‘p so‘rashadi, ularga jang san’atining o‘zi meni tanlagan, deb aytaman. Alloh har bir insonga qanaqadir iqtidor beradi. Agar sen uning ustida shug‘ullansang, nimagadir erishasan. Albatta, ko‘pchilik o‘z yo‘lini topolmaganidan shikoyat qiladi. Menda ham shunday bo‘lgan. Men kichik shaharning tomi yo‘q, issiq suvi yo‘q kichik bir zalidan chiqqanman. Aslanyan qo‘l ostida mashg‘ulotlarni boshladim, birortasini o‘tkazib yubormaslikka harakat qilardim, kiyimlarimni zalda yuvardim, chunki o‘sha bazada turardim va uy ijaraga olishga imkoniyatim yo‘q edi. Pul topish uchun esa qurilishda ishlardim.

Muvaffaqiyatga erishgandan so‘ng atrofda odam ko‘payib qolishi haqida

Bunga xotirjam munosabatda bo‘laman. Menga farqi yo‘q. O‘z yo‘limni va meni boshidan qo‘llab-quvvatlab kelgan insonlarni bilaman. O‘sha paytlari meni muhokama qilgan insonlar hozir yonimda bo‘lishni istaydi. Meni hech narsani bilmaydigan inson deb o‘ylashadi. Ammo hayot atrofimga kerakli insonlarni jamlashni o‘rgatdi. Alloh seni sinab ko‘radi, undan keyin esa o‘n marta yaxshiroq mukofot bilan siylaydi. Bundan qanday foydalanishingni ham kuzatib turadi. Masalan, avvaliga kasal bo‘lasan, shundan so‘ng kuchliroq bo‘lasan. Bu kuchni nimaga sarflashingni esa kuzatib turadi. Agar sen to‘g‘ri yo‘lda sarflasang yana mukofotlanasan. Shuning uchun insonlarga ko‘mak berishga harakat qilaman.

Masalan, 30 kishidan iborat katta jamoam bor, barcha yig‘inlarga, yashashga va ovqatlanishga o‘zim to‘layman. Jamoadoshlarim yaxshi insonlar, nafaqat poytaxtdan, balki butun O‘zbekistondan kelgan. Ularning barchasi nimagadir erishishni istaydi, ammo bu imkoniyat barchaga ham nasib etavermaydi. Yashirmayman, menga yuqori mansabli insonlar yordam beradi. Jamoadoshlarimni qo‘llab-quvvatlayman, vaqti kelsa ular ham yoshlarga yordam beradi. Barcha bilan bo‘lishishga o‘rganib qolganman. Do‘stlarim bu mening eng katta kamchiligim ekanini aytadi.

Odamlar buni suiiste’mol qiladimi? Ba’zan shunaqasi bo‘ladi, lekin hech kimga rad javobini bera olmayman.

Jangovar samboni kuzatayotganda qanday hislarni tuyishi haqida

MMA bilan 10 yildan ortiq vaqt davomida shug‘ullanib kelyapman, men uchun faqat u muhim. Lekin sambo yoqadi. Bizning yonimizga sambodan, jiu-jitsudan chiqqan odamlar keladi. Farq sezilib turadi. Tatamida jang qilish boshqa, MMA boshqa. Sambodan chiqqan jangchilar yaxshi natija ko‘rsatadi. Bolaligimda Fyodor Yemelyanenko men uchun etalon edi. U xuddi shaharda sayr qilgandek oktagonga sovuq bosh bilan chiqardi. Hech qanaqa hissiyotlarsiz oktagonga chiqar va g‘alaba qozonardi. Bunday insonlar milliondan bitta bo‘ladi. Hozir jangchilar g‘alaba qozongandan keyin sakrashni boshlaydi, jangdan oldin bir nimalarni gapiradi. U esa qafasda o‘zini ko‘rsatardi. Xotirjam va o‘ziga ishongan. Xuddi shunday qilish lozim, inson o‘ziga ishonishi kerak.

Yemelyanenko hozir noyob hisoblanadigan eski maktab vakili ekanligi haqida

Albatta. U va ota-onam meni ruhlantiruvchi kishilar. Xudoga shukur, ota-onam hozir hech narsaga muhtoj emas, lekin ular uchun doim nimadir qilishga harakat qilaman.

Yemelyanenko, Habib Nurmagomedovni haligacha hurmat qilaman. Ikkinchisini barchaga nimaga qodirligini ko‘rsatib qo‘yib, so‘zida turib, ketgani uchun.

Habib Nurmagomedovning UFC’ga qaytishi haqida

Unday bo‘ladi deb o‘ylamayman. U Konorga o‘xshab ijtimoiy tarmoqlarda “Men ketdim”, “Men qaytdim” deydiganlardan emas.

Habibning futbolchi bo‘lish qarori jiddiyligi haqida

O‘ylashimcha, Habib birorta jamoani sotib oladi. Balki bir nechta o‘yinda maydonga tushar. Lekin bu shunchaki piar doirasida bo‘lsa kerak. Chunki bunday xabar Amerika, MDH davlatlariga tez tarqaydi, Rossiyada esa u eng mashhur odamlardan biri. Uning har qadamini, har bir gapini kuzatishadi. Hattoki o‘zim ham uning intervyularini kuzataman va nimadir o‘rganaman.

Meyvezer uni MMA’ning eng yaxshi jangchisi deb e’tirof etgani haqida

Juda ko‘p mashhur insonlar, sportchilar menga e’tibor qaratadi. Masalan, Floyd bilan Pragada tanishganman. Menga u insonning o‘zini tutishi qiziq edi. Uchishimiz kerak, ammo parvoz kechiktirildi. O‘shanda tanishib qolganmiz, 5-6 yildan buyon do‘stmiz. Mening mashg‘ulotlarimni ko‘rib, eng yaxshi jangchi bo‘lishimni aytadi. Floyd meni Amerikaga chaqiryapti. Ammo u yerga borishni istamayman.

Aynan Floyd meni ijtimoiy tarmoqlarda mashhur bo‘lishimga sababchi bo‘lgan. Bir kuni u: “Rasmingni yubor, butun dunyo sen haqingda bilishi uchun uni Instagram’ga qo‘yaman”, degandi. Ikki kundan so‘ng mashg‘ulotlarga borganimda telefonim shunchaki “portladi”.

Eng yaxshi ko‘rgan bokschisi haqida

Muhammad Ali eng yaxshi ko‘rgan bokschim bo‘lgan va shunday bo‘lib qoladi. Bu Meyvezerga yoqmasa ham (kuladi).

O‘z vazn toifasida UFC’dagi eng jiddiy raqibi kimligi haqida

Mening o‘zim!

Bo‘sh tribunada jang qilish qiyinligi haqida

Bunday holga hali tushmadim. Lekin buning ahamiyati yo‘q deb hisoblayman. Ular tribunada bo‘lmasa ham meni ekran ortida qo‘llab-quvvatlab turganini bilaman. Nima uchun jang qilayotganimni bilaman. Ba’zan bozorga borganimda, 80 yoshli onaxonlar jangimni ko‘rganini aytadi. Mana shu men uchun muhim.

Mahmud Murodov, UFC jangchisi