Rossiyada parashyutchilar o‘tirgan samolyot qulab tushdi, to‘rt kishi halok bo‘ldi (video)

Rossiyaning Kemerov viloyatidagi Tanay aerodromida bortida parashyutchi-sportchilar bo‘lgan Let L-410 samolyoti halokatga uchradi, deb yozadi Meduza.

Samolyot Rossiya armiyasi, aviatsiyasi va flotiga ko‘maklashuvchi ko‘ngilli jamiyat (DOSAAF)ning mahalliy bo‘linmasiga tegishli bo‘lgan. Mashq qilib uchish chog‘ida ekipaj komandiri dvigatellardan biri ishlamay qolganini ma’lum qilgan, shundan keyin aerodromga qaytishga qaror qilingan. Orqaga burilish chog‘ida samolyot qanoti bilan daraxtlar shox-shabbalariga urilgan va yerga qulagan. “Interfaks” manbalariga ko‘ra, samolyot 100 metr balandlikdan tushib ketgan.

Samolyot bortida 19 kishi bo‘lgan. Dastlab DOSAAF hududiy bo‘linmasi to‘qqiz kishi — ikki uchuvchi va yetti yo‘lovchi halok bo‘lganini ma’lum qilgandi, keyinroq bu xabar rad etildi. Kemerov viloyati ma’muriyatining rasmiy ma’lumotlariga ko‘ra, to‘rt kishi halok bo‘lib, 15 kishi jarohatlangan. Jabrlanganlarning to‘rt nafari og‘ir, 11 nafari — o‘rtacha og‘ir ahvolda.

Bortdagilar orasida yirik biznesmen, “Kuznetskiy Yujniy” ko‘mir koni egalaridan biri Timur Frank ham bo‘lgan. U og‘ir ahvolda kasalxonaga yotqizilgan.

Halokat munosabati bilan Rossiya Tergov qo‘mitasi G‘arbiy-Sibir transportda tergov boshqarmasi tergovoldi tekshiruvini boshladi. “Interfaks” manbasiga qaraganda, aprelda samolyot rejali davriy texnik xizmat ko‘rsatishdan o‘tgan. DOSAAF ma’lum qilishicha, samolyot bir kun ichidagi to‘rtinchi parvozini amalga oshirayotgan bo‘lgan.

Let L-410 Turbolet — ko‘p maqsadli ikki motorli samolyot bo‘lib, 1960-yillarning oxirida Chexoslovakiyada ishlab chiqilgan. U tayyorlanmagan tuproqli, o‘tli, qorli maydonlarda hamda o‘chish-qo‘nish yo‘lagi qisqa bo‘lgan aerodromlarda foydalanish uchun mo‘ljallangan.