Eronda prezident saylovi uchun tashkil qilingan saylov uchastkalaridan saylov qutilarini olib ketayotgan vertolyot avariyaviy qo‘nish chog‘ida halokatga uchradi, deb xabar bermoqda “RBK” Xuzestan viloyati gubernatori Sulaymoniy Dashtakiyga tayanib.
“Hodisa oqibatida bir yo‘lovchi halok bo‘ldi, u huquq-tartibot organlari xodimi bo‘lgani aytilmoqda”, — dedi gubernator.
Uning so‘zlariga ko‘ra, yana bir necha kishi yaralangan. Jabrlanganlarning barchasi kasalxonaga yotqizilgan, ba’zilarining ahvoli og‘ir deb baholanmoqda.
Dashtakiyning qo‘shimcha qilishicha, aviahalokat vertolyot dvigatelida bosimning pasayib ketishi bilan bog‘liq bo‘lishi mumkin.
Bu orada Eron prezidenti saylovining yakuniy natijalari mamlakat ichki ishlar vaziri Abdulrizo Rahmoniy Fazliy tomonidan e’lon qilindi. Ularga ko‘ra, Eron Oliy sudi raisi Ibrohim Raisiy 17,9 million kishi (saylovchilarning 62 foizi)ning ovozini qo‘lga kiritib, mamlakat prezidenti etib saylangan.
Ovoz berishda jami saylovchilarning 48,8 foizi — 28,9 milliondan ortiq odam qatnashgan.
AQSh sanksiyalariga uchragan 60 yoshli siyosatchi 2019-yildan beri Eron sud hokimiyatining rahbari bo‘lib, undan avval bosh prokuror vazifasini bajargan. Saylov kampaniyasi davomida Ibrohim Raisiy qashshoqlik va korrupsiyaga qarshi kurashishga, to‘rt yil ichida 4 million yangi uy qurishga va “Eronda kuchli xalq hokimyati” qurishga va’da bergan.
2017-yilda ham Ibrohim Raisiy prezidentlik uchun nomzodini qo‘ygan, ammo Hasan Ruhoniyga yutqazgan edi. Raisiy ilgari Eron va oltita xalqaro vositachi o‘rtasidagi Eron atom bitimini qattiq tanqid qilgan. Biroq endi u boshqa nomzodlar singari, agar AQSh bitimga qaytadigan bo‘lsa, bitim shartlarini bajarishga tayyorligini bildirmoqda.
Zamonaviy Eron tarixidagi o‘n uchinchi prezident saylovlari mahalliy vaqt bilan 19-iyun, shanba kuni soat 02:00 da (Toshkent vaqti bilan 02:30) yakunlandi. Ovoz berish 18-iyun, juma kuni 07:00 da (Toshkent vaqti bilan 07:30) boshlanib, yarim tungacha davom etishi kerak edi, ammo ajratilgan vaqtda hamma ovoz berishga ulgurmagani uchun saylov uchastkalarining ishlash vaqti uzaytirildi.
Izoh (0)