Vazirlar Mahkamasining tegishli qarori bilan Farg‘ona davlat universiteti va Qo‘qon davlat pedagogika institutiga rektor tayinlandi, deb xabar beradi O‘zA.

Ma’lum qilinishicha, Bahodirjon Shermuhammadov Farg‘ona davlat universiteti rektori etib tayinlangan.

Foto: Oliy va o‘rta maxsus ta’lim vazirligi

Bunga qadar Bahodirjon Shermuhammadov Prezident administratsiyasi milliy qadriyatlar, ma’naviyat va ma’rifatni o‘rganish hamda rivojlantirish sho‘basi bosh konsultanti, oliy va o‘rta maxsus ta’lim vazirining yoshlar, ma’naviyat va ma’rifat masalalari bo‘yicha o‘rinbosari lavozimlarida faoliyat yuritgan.

Shuningdek, Dilnoza Xo‘jayeva Qo‘qon davlat pedagogika instituti rektori etib tayinlangan.

Foto: Qo‘qon davlat pedagogika instituti

Dilnoza Xo‘jayeva bunga qadar mazkur institutning ilmiy ishlar va innovatsiyalar bo‘yicha prorektori lavozimida faoliyat yuritgan.

Eslatib o‘tamiz, fevral boshlarida Qo‘qon davlat pedagogika institutiga borgan oliy va o‘rta maxsus ta’lim vaziri Abduqodir Toshqulov institutining “chastniy lavochka”dan farqi yo‘qligini ta’kidlagan edi. O‘shanda vazir “Ilmiy ishlar va innovatsiyalar bo‘yicha prorektor (Dilnoza Xo‘jayeva) 20-25 yildan beri lavozimda, fan nomzodi, dotsentlik olmagan. Ayol kishi ilmiy bo‘lim boshlig‘i, ayol kishi prorektor. Nimaga o‘zlari namuna bo‘lib, doktorlik (dissertatsiya) qilmaganlar? Nega doktorlarni olib kelib qo‘ymaysizlar shu joyga?”, — degan edi.