Тошкент вилояти Олмалиқ шаҳрида жойлашган Ammofos-Maxam акциядорлик жамиятида кўп йиллардан буён ишлаб келган аёллар сабабсиз ишдан бўшатилаётгани ҳақида хабар берилганди. Ҳолат бўйича Тошкент вилояти Давлат меҳнат инспекцияси томонидан ўрганиш ўтказилди.
Ўрганишда жамият ишчи ходимлари учун озиқ-овқат маҳсулотлари Касаначиликни ташкил қилиш хизмати ходимлари томонидан етиштирилиши маълум бўлди. Озиқ-овқат маҳсулотларини тайёрлаш сифатини яхшилаш, ишлаб чиқариш билан боғлиқ харажатларни оптималлаштириш мақсадида жамият ходимларининг овқатланишини ташкил этиш 2021 йил 1 мартдан аутсорсинг шартлари асосида ихтисослаштирилган компанияга топширилган.
Натижада Касаначиликни ташкил қилиш хизмати ходимлари билан меҳнат шартномасини Меҳнат кодексининг 100-моддаси иккинчи қисми 1-банди (меҳнат шартномасини иш берувчининг ташаббуси билан бекор қилиш) билан бекор қилиш бўйича огоҳлантириш хатлари берилган.
Ҳолат бўйича жамият раҳбариятига амалдаги қонунчилик нормаларига риоя этиш юзасидан зарур тавсиялар берилган.
Эслатиб ўтамиз, Ammofos-Maxam АЖ билан жами 99 нафар ходим касаначи сифатида шартнома тузиб, ишлаб келган. Улар корхонага қарашли бўлган ошхона учун қишлоқ хўжалиги маҳсулотларини етиштириб берган. 2021 йил 1 мартдан ошхоналар аутсорсинг шартлари асосида мазкур фаолият билан шуғулланувчи компанияга берилган. Ғолиб компания эса зарур бўлган маҳсулотларни узоқ муддатли шартномалар асосида ўз етказиб берувчиларидан сотиб олишни афзал кўрган.
Натижада жами 99 та касаначи иш ўрнини қисқартиришга тўғри келган. Улардан 47 нафари Олмалиқ шаҳрида доимий рўйхатдан ўтган. Корхонанинг ходимлар бошқармаси бошлиғи Барно Мирсаидова берган ахборотга кўра, 99 нафар касаначидан 28 нафари туғруқ таътилида бўлганлиги сабабли бу қисқартиришга учрамаслиги таъкидланди. Қолган 71 нафар касаначи қисқартириш бўйича меҳнат қонунчилигига асосан, расмий огоҳлантирилган бўлиб, улардан 12 нафари огоҳлантириш хатларига ўз розилиги билан имзо чеккан. Қолган 59 нафар касаначи корхона томонидан қисқартирилиш ҳолатига розилик билдирмаган.
Бундан аввал Олмалиқ кон-металлургия комбинати (ОКМК)га ишга жойлашиш масаласи сабаб бир гуруҳ аёллар шаҳардаги йўлнинг қатнов қисмини тўсиб қўйганди. Ҳолатни ўрганиб чиққан Бандлик ва меҳнат муносабатлари вазирлиги расмий баёнот берганди.
Изоҳ (0)