Toshkent viloyati Bo‘stonliq tumanidagi “Chorvoq oromgohi” (“Piramidalar”) dam olish maskani sotuvga qo‘yildi, deb xabar bermoqda Davlat aktivlarini boshqarish agentligi.
Ushbu dam olish hududi katta bo‘lgani uchun u 8 ta alohida lotlarga bo‘lgan holda savdoga qo‘yilgan. Bundan tashqari, uning yaqinida joylashgan qurilishi tugallanmagan dam olish oromgohi va bino-inshootlar ham ushbu lotlardan o‘rin oldi. Bu haqda quyidagi havola orqali batafsil tanishish mumkin.
Talabgorlar tomonidan bir yoki bir nechta lotlar bo‘yicha takliflar taqdim etilishi mumkin. Bunda har bir lot bo‘yicha takliflar alohida-alohida beriladi. Alohida shart ham bor — uning yangi egasi obyektda turizm yo‘nalishini saqlab qolishi lozim.
Obyektni sotish ikki bosqichda amalga oshiriladi:
- birinchi bosqichda talabgorlar oldindan malakalanadi (saralanadi), jumladan, savdolarda qatnashish uchun talab qilingan hujjatlarning to‘liqligi, zakalat puli kelib tushganligi, davlat aktivlaridan kelgusida foydalanish yo‘nalishlariga qo‘yilgan talabga nisbatan talabgor tomonidan taklif etilgan biznes konsepsiyasi loyihasining maqbul yoki maqbul emasligi ko‘rib chiqiladi;
- ikkinchi bosqichda talabgorning tijorat takliflari (sotib olish narxi va to‘lovni amalga oshirish muddati) hamda to‘lov qobiliyati baholanadi.
Avvalroq Toshkent viloyati Bo‘stonliq tumanida joylashgan “Soyliq” oromgohi auksion orqali 14,4 milliard so‘mga sotilgani haqida xabar berilgan edi.
Izoh (0)