Britaniyaning Speedmaster auksioni orqali “Formula-1”ning yetti karra chempioni Mixael Shumaxer o‘zining birinchi poygasida qatnashgan Jordan 191 poyga bolidi sotuvga qo‘yildi. “Formula” tarixidagi eng chiroyli bolidlardan biri 1,25 million funt sterlingga baholanmoqda, deb xabar beradi Motor.
Mixael Shumaxer Jordan 191 bolidining ruliga birinchi bor 1991-yili Belgiyada o‘tkazilgan Gran-prida o‘tirgan. Yosh poygachi jamoa tarkibidagi Bertran Gashoni almashtirgan (u qamoqqa tushib qolgan) va tajribali Andrea de Chzarisning sherigiga aylangan. 22 yoshli poygachi kvalifikatsiyani yettinchi o‘rinda yakunlagan, biroq asosiy poyga vaqtda bolidning muftasi ishdan chiqqan, shu sababli Shumaxer finishga qadar yetib kelmagan.
1991-yilgi mavsumdan so‘ng, avtomobil belgiyalik kolleksionerga sotib yuborilgan va u 14 yil davomida mashinaga egalik qilgan. Jordan 191’ning hozirgi egasi mashina bilan ko‘plab mavzuga oid tadbirlarda ishtirok etgan. Masalan, bolid Gudvuddagi “Tezlik festivali”da, shuningdek, Masters Historic Race Weekend ko‘rgazmasida namoyish etilgan.
1991-yilda sportkar Autosport jurnalining versiyasi bo‘yicha eng yaxshi avtomobil deya topilgan. Uch yil oldin esa Britaniyaning The Telegraph nashri Jordan 191’ga “Formula-1”ning eng chiroyli bolidlaridan biri nomini bergan. Sotuvchining so‘zlariga ko‘ra, afsonaviy mashina to‘liq soz holatda bo‘lib, ta’mirga muhtoj emas.
Jordan 191’ga 650 ot kuchini taqdim etishga qodir 3,5 litrli Ford Cosworth V8 dvigateli o‘rnatilgan. Agregat olti pog‘onali mexanik uzatmalar qutisi yordamida boshqariladi. Sotuvchi afsonaviy bolid bilan birga avtomobilning haqiqiyligini tasdiqlovchi sertifikat, shuningdek, Shumaxerning dastxati tushirilgan sportkar nusxasi va original poyga rulini ham taqdim etadi.
Eslatib o‘tamiz, 2017-yilda Mixael Shumaxerning Ferrari F2001 poyga mashinasi Sotheby’s kimoshdi uyi savdolarida 7,5 million dollarga sotilgan edi.
Mavzuga doir: “Formula-1” chempioni o‘z kolleksiyasidagi Ferrari, Mercedes-Benz va BMW’larni sotmoqda (foto)
Izoh (0)