Михаэль Шумахернинг биринчи пойга автомобили сотувга қўйилди (фото)

Британиянинг Speedmaster аукциони орқали «Формула-1»нинг етти карра чемпиони Михаэль Шумахер ўзининг биринчи пойгасида қатнашган Jordan 191 пойга болиди сотувга қўйилди. «Формула» тарихидаги энг чиройли болидлардан бири 1,25 миллион фунт стерлингга баҳоланмоқда, деб хабар беради Motor.

Михаэль Шумахер Jordan 191 болидининг рулига биринчи бор 1991 йили Бельгияда ўтказилган Гран-прида ўтирган. Ёш пойгачи жамоа таркибидаги Бертран Гашони алмаштирган (у қамоққа тушиб қолган) ва тажрибали Андреа де Чзариснинг шеригига айланган. 22 ёшли пойгачи квалификацияни еттинчи ўринда якунлаган, бироқ асосий пойга вақтда болиднинг муфтаси ишдан чиққан, шу сабабли Шумахер финишга қадар етиб келмаган.

1991 йилги мавсумдан сўнг, автомобиль бельгиялик коллексионерга сотиб юборилган ва у 14 йил давомида машинага эгалик қилган. Jordan 191’нинг ҳозирги эгаси машина билан кўплаб мавзуга оид тадбирларда иштирок этган. Масалан, болид Гудвуддаги «Тезлик фестивали»да, шунингдек, Маsters Historic Race Wееkend кўргазмасида намойиш этилган.

1991 йилда спорткар Autosport журналининг версияси бўйича энг яхши автомобиль дея топилган. Уч йил олдин эса Британиянинг The Telegraph нашри Jordan 191’га «Формула-1»нинг энг чиройли болидларидан бири номини берган. Сотувчининг сўзларига кўра, афсонавий машина тўлиқ соз ҳолатда бўлиб, таъмирга муҳтож эмас.

Jordan 191’га 650 от кучини тақдим этишга қодир 3,5 литрли Ford Sosworth V8 двигатели ўрнатилган. Агрегат олти поғонали механик узатмалар қутиси ёрдамида бошқарилади. Сотувчи афсонавий болид билан бирга автомобилнинг ҳақиқийлигини тасдиқловчи сертификат, шунингдек, Шумахернинг дастхати туширилган спорткар нусхаси ва оригинал пойга рулини ҳам тақдим этади.

Эслатиб ўтамиз, 2017 йилда Михаэль Шумахернинг Ferrari F2001 пойга машинаси Sotheby’s кимошди уйи савдоларида 7,5 миллион долларга сотилган эди.