Las-Vegasdagi konferens-markaz ostida ikki yil oldin The Boring Company tomonidan loyihalashtirilgan dunyodagi birinchi tezyurar yerosti tunneli ishga tushirildi. Amerika kompaniyasining rahbari Ilon Maskning g‘oyasiga ko‘ra, noyob inshoot va Tesla elektrokarlari yordamida tadbir ishtirokchilari markazning ikki chetiga tezda yetib olishi mumkin. Biroq aslida vaziyat kutilganidek bo‘lib chiqmadi, deb xabar beradi Motor.
Loop Transportation System tezyurar tunneli haqida birinchi bor besh yil oldin ma’lum bo‘lgandi. O‘shanda Ilon Mask yerosti trassasini dunyodagi muqobili yo‘q inqilobiy inshoot deb ta’riflagan edi. Tesla elektrokarlari yordamida Las-Vegasdagi konferens-markaz tashrif buyuruvchilari soatiga 200 kilometr tezlikda binoning bir qismidan yuzaning istalgan nuqtasiga yetib olishi kerak bo‘lgan. Qurilish ishlari boshlanganidan ikki yil o‘tib, yerosti tunneli ilk mehmonlarini qabul qildi.
Ma’lum bo‘lishicha, innovatsion yerosti inshooti 12 metr chuqurlikda joylashgan bir tomonlama harakatga ega ikkita tunneldan iborat. Butun trassa o‘zaro uchta stansiyani birlashtiradi. Ammo tezlik rejimi tashrif buyuruvchilarning hafsalasini pir qilgan. Haydovchilar va’da qilingan soatiga 200 kilometr tezlik o‘rniga bazo‘r 60 kilometrdan ortiqroq harakatlana olgan. Shu bilan birga, katta tezlikda harakatlanishning imkoni bo‘lmagan, chunki elektromobillar bir-biriga muntazam xalaqit bergan.
Omadsiz ishga tushirishga qaramay, tunnelni qurish bilan shug‘ullangan The Boring Company firmasi mutaxassislari yerosti trassasi soatiga 4400 yo‘lovchini tashishga qodirligini aytmoqda. Biroq buning uchun transport tizimini kengaytirish kerak. ammo ekspertlar loyihaning davom etishiga shubha bildirmoqda. Chunki Loop Transportation System tunnelining har 1,5 kilometrini qurish uchun bir milliard dollar sarflanyapti.
Eslatib o‘tamiz, 2017-yilda The Boring Company AQSh rasmiylaridan Nyu-York va Vashington o‘rtasida Hyperloop deb nomlangan o‘ta tezkor tunnel qurilishiga ruxsat olgan edi.
Izoh (0)