Murodullo Xolmuhamedov boshqa ishga o‘tishi munosabati bilan oliy va o‘rta maxsus ta’limi vazirining kasb-hunar ta’limi masalalari bo‘yicha o‘rinbosari lavozimidan ozod etildi. Bu haqda Telegram’dagi “Nigoh” kanali xabar berdi.
Murodullo Xolmuhamedov 2017-yildan buyon vazirlikning Kasb-hunar ta’limi markazi rahbari hamda 2019-yildan vazir o‘rinbosari sifatida ishlab kelayotgan edi. U bungacha vazirlikning Samarqand viloyati boshqarma boshlig‘i lavozimida ham faoliyat yuritgan.
Eslatib o‘tamiz, Prezident Shavkat Mirziyoyev 3-aprel kuni davlat hokimiyati va boshqaruvi organlarining shtat birliklari sonini qisqartirish to‘g‘risidagi qarorni imzolagandi. Qarorda oliy va o‘rta maxsus ta’lim vazirining ikki o‘rinbosari lavozimi bekor qilinishi ko‘rsatilgan: ulardan biri kasb-hunar ta’limi masalalari bo‘yicha o‘rinbosar lavozimi ekani ta’kidlanib, ikkinchi o‘rinbosar lavozimi qaysi ekaniga aniqlik kiritilmagan.
“Kun.uz”ning yozishicha, qisqartirilayotgan ikkinchi mansab – vazirning axborot texnologiyalari va yoshlar bo‘yicha o‘rinbosari lavozimidir.
Bu lavozimda hozirda 31 yoshli Yusuf Absoatov ishlab kelmoqda. U 2020-yil yanvarida Prezident o‘tkazgan yig‘ilishda vazir o‘rinbosarligiga tavsiya qilingandi. U o‘sha vaqtda O‘zbekiston Milliy universitetining 2-bosqich magistratura talabasi edi.
Izoh (0)