Hukumatning 3-iyundagi qarori bilan Respublika Ma’naviyat va ma’rifat markazi huzurida Ijtimoiy-ma’naviy tadqiqotlar instituti tashkil etildi, deb xabar bermoqda Norma.
Hujjat Prezidentning 26-martdagi “Ma’naviy-ma’rifiy ishlar tizimini tubdan takomillashtirish chora-tadbirlari to‘g‘risida”gi farmonini amalga oshirish maqsadida qabul qilingan.
Institut vazifalari quyidagilardan iborat:
- ma’naviy-ma’rifiy ishlar holati, milliy g‘oyaning mamlakat taraqqiyotidagi o‘rni, jamiyat barqarorligiga salbiy ta’sir ko‘rsatadigan tahdidlar to‘g‘risida ilmiy-amaliy izlanishlar olib borish;
- mamlakatdagi ijtimoiy va ma’naviy muhit holatini o‘rganish, baholash va yaxshilash bo‘yicha ilmiy va amaliy takliflarni tayyorlash;
- ma’naviy-ma’rifiy targ‘ibot ishlarini amalga oshirishning samarali va ta’sirchan zamonaviy targ‘ibot texnologiyalari hamda usullarini ishlab chiqish;
- buzg‘unchi g‘oyalar va axborot tahdidlariga qarshi mafkuraviy immunitetni mustahkamlash bo‘yicha tadqiqotlar o‘tkazish, aholi o‘rtasida internetdan foydalanish madaniyatini oshirish;
- odamlar taqdiriga befarqlik, mahalliychilik, qarindoshlik, korrupsiya, oilaviy qadriyatlarga beparvolik, yoshlar tarbiyasidagi mas’uliyatsizlikni yo‘q qilishga qaratilgan kompleks chora-tadbirlarni ishlab chiqish.
Muassasa davlat budjeti, xayriya mablag‘lari va xalqaro grantlar va qonunchilikda taqiqlanmagan boshqa manbalar hisobidan moliyalashtiriladi.
Eslatib o‘tamiz, Shavkat Mirziyoyev 19-yanvar kuni ma’naviyat masalalariga bag‘ishlab o‘tkazilgan yig‘ilishda “Manaviyat targ‘ibotchisi” ta’lim muassasasi negizida Ijtimoiy va ma’naviy tadqiqotlar institutini tashkil etishni taklif qilgandi.
Izoh (0)