“O‘zgidromet” tashabbusi bilan Qoraqalpog‘istonda joylashgan Chimboy tumani meteostansiyasida atmosfera havosidan ichimlik suvini ishlab chiqarish “atmosfera suv generatori” (Airaqua — 7 ta tozalash filtridan iborat) qurilmasi tajriba tarzida ishga tushirildi. Bu haqda “O‘zsuvta’minot” xabar qildi.
Qurilma ichimlik suvi yetib bormagan va yetkazib berish iqtisodiy jihatdan qimmatga tushadigan hududlarga moslashtirilgan. Ushbu innovatsion texnologiya sinov tariqasida yo‘lga qo‘yildi va undan olinayotgan statistik ma’lumotlardan foydalangan holda respublikadagi boshqa meteostansiyalarga o‘rnatish rejalashtirilmoqda.
Atmosfera havosi namliklarning ulkan rezervuari ekani hisobga olinsa, atmosfera suv generatorini atmosfera suvini ishlab chiqaruvchi dunyodagi eng samarali qurilma deyish mumkin. Ta’kidlanishicha, ushbu moslama distillangan suvdan ham tozaroq suv olish imkonini beradi.
Qurilma atmosfera havosi namligiga va haroratga qarab, kuniga, taxminan, 12 litrdan 30 litrgacha ichimlik suvi yetkazib berish imkonini beradi. Qurilma ko‘p quvvat (1 kilovatt) talab qilmaydi, ixcham, ekologik toza, foydalanishda texnik jihatdan inson hayotiga xavfi yo‘q.
Bundan avval Qoraqalpog‘iston tug‘ruqxonalariga YuNISEF va UNFPA tomonidan 1 million dollarlik tibbiy asbob-uskunalar sovg‘a qilingani, BMT Bosh assambleyasi Orol dengizi mintaqasi bo‘yicha maxsus rezolyutsiya qabul qilgani hamda Orolbo‘yi aholisiga biznes ko‘nikmalari o‘rgatilishi haqida xabar berilgandi.
Izoh (0)