Дунёда ядро қуролларига бир йилда 72 млрд доллардан ортиқ маблағ сарфланди

Ядро қуролига эга мамлакатлар ушбу турдаги қуролга 2020 йилда 72,6 миллиард доллар сарфлаган. Бу ҳақда Ядро қуролини йўқ қилиш бўйича халқаро кампания (ICAN) ҳисоботига таяниб, «РБК» хабар берди.

Ҳисобот муаллифларининг таъкидлашича, ядро қуролига сарфланган маблағ миқдори 2019 йилга нисбатан 1,4 миллиард долларга кўпайган. Дақиқаларга ҳисоблаганда, мамлакатлар ядро қуроли учун ҳар дақиқада 137 666 доллар сарфлаган.

ICAN ҳисоб-китобларига кўра, АҚШ ядровий қурол ишлаб чиқаришга энг кўп сармоя киритган — 37,4 миллиард доллар, бу Хитой сармоясидан 3,7 баравар кўп. Хитой 10,1 миллиард доллар сармоя билан иккинчи ўринда турибди. Россия ушбу кўрсаткич бўйича учинчи ўринда. Мамлакат бир йилда 8 миллиард доллар (ёки ҳар дақиқада 15 222 доллар) сарфлаган.

Ядро қуролига энг кўп маблағ сарфлаган мамлакатлар бешлиги Буюк Британия (6,2 миллиард доллар) ва Франция (5,7 миллиард доллар) билан якунланган. Ундан кейин Ҳиндистон (2,48 миллиард), Исроил (1,1 миллиард доллар) ва Покистон (1 миллиард доллар) турибди.

Ҳисоботга кўра, ядровий қурол ишлаб чиқаришда энг кам миқдордаги сармоя КХДР томонидан киритилган, мамлакатнинг бу йўналишдаги харажатлари 2020 йилда 667 миллион долларни ташкил этган.

Ҳисобот муаллифларининг таъкидлашича, бутун дунё COVID-19 пандемиясига қарши кураш олиб борган 2020 йилда ядро қуроли ишлаб чиқариш учун харажатларнинг ошиши бизнес манфаатларигагина боғлиқ.

ICAN маълумотларига кўра, юқоридаги мамлакатларнинг ўнга яқин компанияси ядровий қурол ишлаб чиқариш учун умумий қиймати 27,7 миллиард долларга тенг бўлган янги буюртмаларни олган ёки мавжудларини узайтирган.

Март ойининг ўрталарида Буюк Британия ҳукумати ядровий салоҳиятини ошириш ниятида эканини маълум қилганди. Мамлакатнинг мудофаа ва ташқи сиёсат стратегиясида Trident баллистик ракеталари учун ядро каллаклари сонини 180 тадан 260 тага кўпайтириш билан давлатнинг ядровий салоҳиятини 40 фоизга ошириш режаси келтирилган. Ядро зарядлари тўртта Вангуард синфидаги ракета сувости крейсерларига жойлаштирилади, улардан бири доимо патрулда бўлади.

Апрель ойида АҚШ энергетика вазири Женифер Гренхолм Вашингтон бошқа давлатларнинг тажовузкорлигини олдини олиш учун ядровий имкониятларини модернизация қилиши кераклигини айтганди.