AQSh Qurolli Kuchlari Strategik qo‘mondonligi rahbari admiral Charlz Richard Rossiya yoki Xitoy bilan yadroviy urush ehtimoliga baho berdi. U bu haqda AQSh Harbiy dengiz institutining rasmiy nashri uchun yozilgan maqolasida aytgan, deya xabar bermoqda “Lenta.ru”.

Foto: Medium

Uning fikricha, SSSR qulaganidan so‘ng Pentagon yadroviy qurol bilan to‘g‘ridan to‘g‘ri harbiy to‘qnashuv ehtimolini ko‘rib chiqishi shart bo‘lmagan, ammo hozir vaziyat o‘zgargan.

“Mintaqaviy nizo kelib chiqqan vaqtda Rossiya yoki Xitoy an’anaviy qurollardan foydalangan holda mag‘lubiyatga uchrasa va siyosiy tizim hamda davlatga tahdid tug‘ilsa, nizo tezda yadro quroli to‘qnashuviga aylanib ketishi ehtimoli bor”, – dedi Charlz Richard. Uning qo‘shimcha qilishicha, rasmiy Vashington potensial dushmanlar tomonidan yadro qurolidan foydalanish imkoniyatini istisno etmasligi kerak.

Admiralning so‘zlariga ko‘ra, AQSh Mudofaa vazirligi terrorizmga qarshi kurashga e’tibor qaratgan bir paytda Rossiya va Xitoy tajovuzkor siyosat yuritishni boshlagan. Uning qo‘shimcha qilishicha, ushbu mamlakatlar sovuq urush avj olgan paytdan beri kuzatilmagan xalqaro me’yorlarni kuch ishlatib buzmoqda. Admiral bu harakatlar javobsiz qolmasligi ta’kidladi.

Richard boshqa mamlakatlarning tajovuzkorligini jilovlash uchun Qo‘shma Shtatlar faol raqobatlashishi kerakligini ta’kidladi.

“Ularning tashabbuslariga ko‘nsak yoki javob qaytarmasak, ular Qo‘shma Shtatlar javob berishni xohlamayapti yoki berolmayapti, degan ishonchlarini mustahkamlashi xavfi bor. Bu esa ularni yanada qo‘zg‘atishi mumkin”, – deb xulosa qildi amerikalik admiral.

Yanvar oyi boshida Qo‘shma Shtatlardagi Ratger universiteti olimlarining aniqlashicha, urush paytida yadro qurolidan keng miqyosda foydalanish ekvatorial Tinch okeanida misli ko‘rilmagan ob-havo o‘zgarishiga olib keladi, bu esa suv o‘tlari populyatsiyasini 40 foizga kamaytirishi hamda baliq ovi qisqarishiga olib keladi.

Avvalroq AQSh Afg‘oniston va Iroqdagi qo‘shinlari sonini oshirishi mumkinligi, Pentagon rahbari etib Lloyd Ostin tasdiqlangani hamda AQShda uchuvchilar tomonidan videoga olingan “uchar odam” aslida nima ekanligi ma’lum bo‘lgani haqida xabar berilgandi.