Koronavirus pandemiyasi Afg‘oniston, Iroq va Suriyadagi IShID va “Al-Qoida” kabi terrorchi guruhlar tomonidan tahdidlarning ko‘payishiga olib keldi, deb xabar qilmoqda Associated Press BMT ekspertlarining hisobotiga asoslanib.

Foto: AP Photo

“Afg‘oniston ham IShID, ham “Al-Qoida” uchun muhim hudud bo‘lib qolmoqda va tinchlik jarayoni ikkala guruh tahdidlarini bostirishning asosiy shartidir”, – deyiladi ekspertlarning BMT Xavfsizlik kengashidagi hisobotida.

Mutaxassislar Afg‘onistonning 11 viloyatida harakat qilayotgan IShID jangarilarining soni 1000-2200 nafargacha, “Al-Qoida”niki esa 200-500 nafarga kamayganini taxmin qilmoqda. BMT “Al-Qoida” qo‘mondonligi kelajakda “Tolibon” bilan aloqalarni yaxshilaydi, deb hisoblaydi.

Afg‘oniston, shuningdek, dunyodagi terrorizmdan eng ko‘p zarar ko‘rgan mamlakat hisoblanadi. AQSh va “Tolibon” o‘rtasida 2020-yil 29-fevralda tinchlik bitimi tuzilganiga qaramay, o‘sha paytdan beri mamlakatda 2500 xavfsizlik xodimi va 600 dan ortiq tinch aholi halok bo‘lgan.

O‘z navbatida ekspertlarning fikriga ko‘ra, Iroq va Suriya IShID uchun “asosiy zona” bo‘lib qolmoqda, garchi jangarilar tomonidan hududlarni egallab olish imkoniyatlari hozirda mavjud bo‘lmasa ham.

BMTning ma’lum qilishicha, mamlakat xavfsizlik kuchlari operatsiyalariga qaramay 10 ming nafargacha IShID terrorchilari Iroq va Suriyada faoliyatini davom ettirmoqda. Shu bilan birga, Suriyaning Idlib viloyati terrorchilar, shu jumladan, “Al-Qoida” bilan aloqador jangarilar uchun “xavfsiz joy” bo‘lib qolmoqda.

Shu bilan birga, BMT avvalgi qator hujumlarga qaramay, Yevropada terrorchilik xavfi nisbatan past bo‘lib qolmoqda, deb hisoblaydi. BMTning ta’kidlashicha, Isroil va bir qator arab davlatlari o‘rtasidagi munosabatlarni normallashishi mintaqada terroristlik hujumlarini sodir qilish uchun tashviqot sifatida foydalanilmoqda

Xabarda aytilishicha, ekstremistlar Afrika qit’asida, asosan, ular tomonidan eng ko‘p zarar yetkaziladigan Mozambikdagi Kabo Delgado viloyatida o‘z pozitsiyalarini mustahkamlamoqda. Shuningdek, qit’aning Sahel mintaqasida IShID jangarilari terrorizmga qarshi operatsiyalar natijasida yo‘qotishlarga qaramay o‘z bo‘linmalari ustidan nazoratni ta’minlashga muvaffaq bo‘ldi.

Mutaxassislar “pandemiya terrorchilardan ko‘ra xavfsizlik kuchlari faoliyatiga ko‘proq to‘sqinlik qildi” degan xulosaga keldi. Shu bilan birga, dunyoning bir qator mintaqalarida karantin cheklovlari susayishi bilan avval rejalashtirilgan terroristik hujumlar sodir bo‘lishi mumkin.

“Pandemiyaning iqtisodiy va siyosiy zarari hamda aksilterror kampaniyalariga salbiy ta’siri uzoq muddatli kelajakda terrorchilik tahdidini kuchaytirishi mumkin”, – deyiladi xabarda.

Avvalroq Bag‘dod markazidagi bozorda portlash sodir bo‘lgani, Ramzan Qodirov “Chechenistonning so‘nggi amiri” o‘ldirilganini e’lon qilgani hamda Rossiyada 2020-yilda 41 ta teraktning oldi olingani haqida xabar berilgandi.