Ukraina Prezidenti Vladimir Zelenskiy AQSh prezidenti Jo Baydenni Shveysariyaning Jeneva shahrida bo‘lib o‘tadigan Rossiya—Amerika sammitidan oldin u bilan uchrashishga chaqirdi. Axios nashriga bergan intervyusida Zelenskiy Bayden bilan “dunyoning istalgan joyida va istalgan vaqtda” uchrashishga tayyorligini aytdi.
Ukraina prezidentining ta’kidlashicha, AQSh prezidenti ma’muriyati unga Baydenning “Shimoliy oqim 2” gaz quvuri operatoriga qarshi sanksiyalardan voz kechishi to‘g‘risida xabar bermagan. Zelenskiy bu haqda matbuotdan bilib olgan.
Zelenskiyning fikricha, Rossiyaning gaz quvuri Ukraina milliy xavfsizligiga tahdid soladi, AQSh esa Rossiyani to‘xtatishga qodir yagona kuchdir.
“‘Shimoliy oqim 2’ bu Rossiya Federatsiyasi qo‘lidagi qurol, haqiqiy qurol. AQSh kabi buyuk davlat ushbu qurolni o‘q-dorilar bilan ta’minlashi mumkinligini tushunish qiyin”, — dedi Zelenskiy.
Axios Oq Uyga tayanib yozishicha, Bayden ma’muriyati Jeneva sammiti oldidan Ukraina prezidenti bilan uchrashuv tashkil qilishni niyat qilgan, ammo Zelenskiyning “Naftogaz” rahbariyatini o‘zgartirish haqidagi qaroridan keyin bu fikrdan voz kechgan. AQSh Ukraina prezidenti korrupsiyaga qarshi kurashish harakatlaridan shu tarzda chekinayotganidan xavotirda.
4-iyun kuni Rossiya prezidenti Vladimir Putin “Shimoliy oqim 2” gaz quvurining birinchi magistrali uchun quvurlarni yotqizish muvaffaqiyatli yakunlangani va ikkinchi magistral ustida ishlar davom etayotganini ma’lum qilgan edi.
Eslatib o‘tamiz, Vladimir Putin va Jo Baydenning yuzma-yuz uchrashuvi 16-iyun kuni Jenevada bo‘lib o‘tishi kutilmoqda. Avvalroq OAV prezidentlar Jenevaning qaysi nuqtasida uchrashishi mumkinligini ma’lum qilgandi. Uchrashuv vaqtida Jeneva osmoni parvozlar uchun yopiladi.
Izoh (0)