Jons Hopkins universiteti ma’lumotlariga ko‘ra, dunyoda koronavirusga chalinganlar soni 173 329 556 kishini tashkil qilmoqda, shularning 3 729 870 nafari virus qurboniga aylangan. Kasallanish holatlarining ko‘pligi bo‘yicha AQSh (33,3 million), Hindiston (28,9 million), Braziliya (16,9 million), Fransiya (5,7 million) va Turkiya (5,2 million) bormoqda.
Xitoy 3 yoshdan oshgan bolalarni koronavirusga qarshi emlashni boshlaydi
Xitoy COVID-19’ga qarshi Sinovac Biotech vaksinasini 3-17 yoshli bolalar uchun qo‘llashga ruxsat berdi.17 yoshgacha bo‘lgan 500 dan ortiq bolalar ishtirokidagi klinik sinovlar natijalariga ko‘ra, vaksina bolalarda immun reaksiyasini keltirib chiqarishi mumkin, ikkilamchi ta’sirlar esa asosan yengil kechgan.
Sinovac vaksinasining 3-17 yoshli bolalarni emlashda qachondan qo‘llana boshlanishi noma’lum, bu Xitoy sog‘liqni saqlash organlari tomonidan qabul qilinadigan vaksinatsiya strategiyasiga bog‘liq bo‘ladi.
Mavzuga doir: JSST Xitoyning koronavirusga qarshi Sinovac vaksinasini ma’qulladi. Bu tashkilot tomonidan ma’qullangan yettinchi vaksinadir
Malayziyada isitmasi baland odamlarni qidirishda dronlar qo‘llanilmoqda
Koronavirusning oldini olish maqsadida Malayziya hukumati isitmasi baland bo‘lgan odamlarni aniqlash uchun dronlardan foydalanmoqda.Infraqizil datchiklar bilan jihozlangan skanerlovchi dronlar 20 metrgacha balandlikda turib, odamlarning haroratini o‘lchashi va kimningdir issig‘i oshgani haqida ogohlantirishi mumkin.
Avvalroq Malayziya hukumati COVID-19’ga qarshi choralarga rioya qilinishi ustidan nazorat olib borish uchun dronlardan foydalanishi mumkinligi haqida ogohlantirgan edi.
Isroilda niqob rejimi bekor qilinadi
Isroilda 15-iyundan niqob rejimi bekor qilinadi. Maktablar bundan mustasno. Isroilda 1-iyundanoq deyarli barcha cheklovlar olib tashlangan edi.“Qator muhokamalardan keyin shunday xulosaga keldikki, agar yaqin kunlarda COVID-19 tarqalishi bilan bog‘liq vaziyat va tegishli ko‘rsatkichlar yomonlashmasa, biz 15-iyundan binolarda niqob taqish majburiyatini bekor qilamiz”, — dedi Isroil sog‘liqni saqlash vaziri Yuliy Edelshteyn.
Izoh (0)