Суданда араб мамлакатларида янги терактлар уюштиришга тайёрланаётган «Ал-Қоида»нинг тўққиз аъзоси ҳибсга олинди. Бу ҳақда мамлакат Бош прокуратураси Терроризмга қарши кураш департаменти вакили Аҳмед Сулаймон ал-Авад маълум қилди, деб ёзмоқда Al-Sudani нашри.
Таъкидланишича, жангарилар мамлакат пойтахти Хартумда ҳибсга олинган. «Улар орасида Сурия паспортига эга шахслар, шунингдек, Чад ва Тунисдан келган муҳожирлар бор», — деди ал-Авад.
Унинг қайд этишича, ҳибсга олинганларнинг бир қисми БМТ Хавфсизлик Кенгаши томонидан қидирувга берилган, улардан бири Тунисда чет эллик сайёҳларга ҳужум уюштиришда айбланмоқда.
Прокуратура вакили Суданга ноқонуний равишда кириб келганини билдирди, гуруҳ аъзоларининг айримлари мазкур ахборотни тасдиқлаган. Ҳуқуқ-тартибот идоралари ходимларининг сўзларига кўра, қўлга олинганларнинг аксар қисми Форс кўрфази мамлакатларида террорчилик операцияларни тайёрлаш билан шуғулланган.
Хабарларга кўра, БАА Судан ҳукуматига жиноятчиларни экстрадиция қилиш тўғрисида сўров юборган.
Маълум бўлишича, 5 июнь куни жангарилар Ғарбий Африканинг Буркина-Фасо давлати шимолида қуролли ҳужум уюштирган. Унда юздан ортиқ одам ҳалок бўлган. Мамлакат ҳукумати бу сўнгги беш йил ичидаги энг йирик теракт эканини таъкидлаган. Яга провинциясидаги қишлоқ аҳолиси жангариларнинг қурбонига айланган.
Аввалроқ «Ал-Қоида» АҚШга қарши «ҳар томондан ҳужум қилиш» билан кенг кўламли уруш бошлашни ваъда қилганди. Террорчилик ташкилоти вакиллари ушбу урушнинг «АҚШ бутун ислом дунёсидан чиқариб юборилгунга қадар» давом этишини қайд этган.
Изоҳ (0)