Toshkent shahar hokimi Jahongir Ortiqxo‘jayev “Salar” maishiy oqova suvlarini tozalash inshootidan tarqalayotgan yoqimsiz hidni yo‘qotish yuzasidan 5-iyun, shanba kuni yig‘ilish o‘tkazdi, deb xabar bermoqda poytaxt hokimligi matbuot xizmati.
Yig‘ilishda mahalla fuqarolari, raislari, deputatlar, mutasaddi tashkilotlar rahbarlari ishtirok etgan.
“Har bir fuqaroning va mahalla raisining fikri eshitilganidan so‘ng shahar hokimi tomonidan muammoni bartaraf etish yuzasidan mutasaddilarga zarur topshiriqlar berildi”, — deyiladi hokimlik xabarida.
Mahalla fuqarolari va tashkilot rahbarlaridan iborat ishchi guruhi shakllantirilib, mahalla fuqarolaridan muammoning hal etilishi jarayonlari ustidan jamoatchilik nazoratini o‘rnatish belgilangan.
O‘tgan haftada poytaxt hokimligi vakillari Sergeli tumanidagi “O‘zgarish” va “No‘g‘ayqo‘rg‘on” mahallalariga kechki payt muntazam yoqimsiz hid tarqatayotgan, “Toshkent shahar suv ta’minoti” mas’uliyati cheklangan jamiyati tasarrufidagi “Salar” maishiy oqova suvlarini tozalash inshootini ko‘zdan kechirgan edi.
Mazkur inshootda Mirobod, Sergeli, Yakkasaroy, Mirzo Ulug‘bek, Chilonzor va Yangihayot tumanlarining maishiy oqova suvlar tarmog‘i orqali oqib kelayotgan oqova suvlar tozalanadi. U poytaxtdagi maishiy oqova suvlarni qayta ishlashga mo‘ljallangan 3 ta inshootning eng kattasi hisoblanadi va bir kecha-kunduzda 900 ming kubgacha oqova suvlarni tozalaydi.
Inshootga aholi va korxonalar tomonidan kirib keladigan oqova suvlar uchun alohida quvurlar yotqizilgan va ular vositasida yoqimsiz hid aynan qayerdan kelayotganligiga aniqlik kiritish mumkin.
“Mutasaddilarning so‘roviga ko‘ra, terini qayta ishlash va boshqa korxonalar tomonidan oqizilayotgan oqova suvlarga e’tibor qaratildi. Ulardan kuzatuv paytida oqova suvlarni inshootga yo‘naltirish so‘raldi va vaziyat kuzatuvga olindi. Buni qarangki, shu paytda inshootga qop-qora rangli va nihoyatda yoqimsiz hidli oqova suvlar kelib qo‘shildi. Bu tadbirkorlik subyektlarining faoliyatini bevosita nazorat qilishni taqozo qiladi”, — deyiladi xabarda.
Shuningdek, qayd etilishicha, chiqindi suvlarni tozalash jihozlari qimmat bo‘lib, ular xorijdan olib kelinadi. “Bunday mablag‘lar barcha tadbirkorlik korxonalarida ham mavjud emas”, — deb ta’kidlangan xabarda.
“Hukumatimizning bir qator qarorlariga ko‘ra, tadbirkorlar faoliyatiga aralashish qat’iyan man qilinadi. Shu bois korxonalar hududiga kirib, chiqindilar qay tarzda oqova suv tarmoqlariga oqizilayotgani bilan bevosita tanishish mumkin emas. Shu bois ba’zi tadbirkorlar mas’uliyatni unutib, o‘z bilganlaricha ish tutishmoqda. Oqibatda atrof-muhitga, aholiga zarar yetkazilyapti”, — deb ta’kidlanmoqda xabarda.
“‘Toshkent shahar suv ta’minoti’ MChJ mutasaddilari viloyat hokimliklari va xo‘jalik yurituvchi subyektlar rahbarlari bilan birgalikda muammoni chuqur o‘rganib, yechimini topishi lozim”, — deya yakunlangan hokimlik xabari.
Eslatib o‘tamiz, may oyining boshlarida O‘zbekiston Ekologik partiyasi mazkur holatga munosabat bildirib, suv tozalash inshooti va uning atrofidagi korxonalar tomonidan atrof tabiiy muhitga yetkazilayotgan zarar atroflicha o‘rganib chiqilishi hamda bunday salbiy holatlarni bartaraf etish bo‘yicha tegishli choralar ko‘rilishi lozimligini ta’kidlagandi.
Oliy Majlis Senati matbuot xizmat chiqindi suvlarni ifloslantiradigan bir qator korxonalarni tozalash inshootlarini rekonstruksiya qilish to‘g‘risida hukumat qarori loyihasi tayyorlanayotganini ma’lum qilgandi.
Izoh (0)