Yanvar oyida Oq uyni tark etgan AQShning 45-prezidenti Donald Tramp Shimoliy Karolina shtatidagi Grinvill shahrida shtat respublikachilar anjumanida nutq so‘zladi, deb yozadi Reuters.
Xabarga ko‘ra, 90 daqiqalik nutq davomida Tramp, xususan, Xitoy hukumati koronavirus pandemiyasidan yetkazilgan zarar uchun AQShga va butun dunyoga “kamida 10 trillion dollar” to‘lashi kerakligini aytdi. Shuningdek, u barcha mamlakatlarga Xitoyga qarzlarini to‘lashdan bosh tortishni taklif qildi.
Tramp, shuningdek, 2022-yilgi Kongress saylovlarida Respublikachilar partiyasiga yordam berishga tayyorligini aytdi. Shuningdek, u 2024-yilda bo‘lib o‘tadigan prezidentlik kampaniyasida qatnashmoqchi ekaniga yana bir bor ishora qilib, o‘sha yilni intizorlik bilan kutayotganini ta’kidladi.
Donald Tramp 2020-yilgi saylovda g‘alaba qozongan AQSh prezidenti Jo Bayden ma’muriyatini tanqid qildi. Xususan, u Bayden ma’muriyatini “tarixdagi eng radikal so‘llar ma’muriyati” deb atadi. Tramp AQShning amaldagi prezidentini “Shimoliy oqim 2” gaz quvuri qurilishiga qarshi sanksiyalar kiritmasdan, loyihani qo‘llab-quvvatlashda aybladi.
Bundan tashqari, Tramp Xitoy rasmiylari va Rossiya prezidenti Vladimir Putin Baydenni “ochiqdan ochiq mazax qilayotganini” aytdi.
Trampning Shimoliy Karolinada so‘zlagan nutqi uning fevral oyi oxiridan buyon birinchi ommaviy chiqishi bo‘ldi. Amerika OAVlari siyosatchining nutqi uning 2020-yilgi saylovoldi nutqlariga o‘xshashligini ta’kidladi, ammo Associated Press yozishicha, Tramp anjumanda atigi 1200 kishining yonida so‘zlagan. Yana o‘n minglab odamlar uning chiqishini internet orqali kuzatib turgan.
Ma’lumot uchun, Donald Tramp 2017-yildan 2021-yilgacha AQSh prezidenti bo‘lgan. U faoliyati davomida ikki marotaba impichment e’lon qilingan ilk prezidentga aylangan: 2019-yilda Vakillar palatasi uni vakolatini suiiste’mol qilishda va AQSh Kongressining ishiga aralashishda, 2021-yilda esa qo‘zg‘olonga da’vat qilganlikda ayblagan. Senat ikkala ayblov bo‘yicha ham Trampni oqlagan.
Avvalroq Nyu-Yorkda Trampning kompaniyasiga nisbatan jinoiy surishtiruv boshlangani, Twitter Trampning bayonotlarini chiqarish uchun ochilgan akkauntlarni bloklagani, Tramp tarafdorlari bilan muloqot qilish uchun donaldjtrump.com saytini ishga tushirgani haqida xabar berilgandi.
Izoh (0)